Перизат Қайрат екі айға қамауға алынды. Бұл туралы Астана қаласының тергеу соты мәлімдеді, - деп хабарлайды Massaget.kz тілшісі.
2024 жылдың 15 қарашасында сотқа тергеу органдарынан күдікті Қайрат Перизатқа қатысты екі айға дейінгі мерзімге қамауға алу түріндегі бұлтартпау шарасын санкциялау туралы өтініш түскені хабарланды.
"Астана қаласының мамандандырылған ауданаралық тергеу сотының 2024 жылғы 16 қарашадағы қаулысымен күдікті Қайрат П-ға қатысты қамауға алу түріндегі бұлтартпау шарасын санкциялау туралы өтініш хат қанағаттандырылды", - делінген сот хабарламасында.
Басқа деректер Қылмыстық іс жүргізу кодексінің 201-бабына сәйкес жария етілмейді.
Еске салайық, бұған дейін Қаржы мониторингі агенттігі (AFM) Перизат Қайраттың заңсыз әрекетінің тағы бір эпизоды анықталғанын хабарлаған болатын.
Айта кетейік, Перизат Қайрат - Biz Birgemiz Qazaqstan қайырымдылық қорының төрайымы, Қазақстандағы белсенді еріктілер қозғалысының жетекшісі ретінде танымал. Ол су тасқынынан зардап шеккендерге көмек көрсету, Газа секторындағы гуманитарлық миссиялар және басқа да қайырымдылық шараларымен айналысып, қоғамда беделге ие болды.
Қызықты жаңалықтар мен видеоларды көру үшін TikTok арнамызға жазылыңыз!