ПБ басшысының орынбасары мен "прокурор" қатысқан жанжал: Қарағанды прокуратурасы пікір білдірді
![ПБ басшысының орынбасары мен "прокурор" қатысқан жанжал: Қарағанды прокуратурасы пікір білдірді](/userdata/news/news_69715/image_l.jpg)
Әлеуметтік желіде Қарағанды облысы ПД Криминалдық полиция басқармасы бастығының орынбасары Ермек Тобылбаев пен прокуратура қызметкері Алексей Бондарев қатысқан жанжалдың видеосы тарап жатыр, - деп хабарлайды Massaget.kz.
Интернетте тараған видеода бірнеше ер адам балағат сөздер айтып, жанжалдасып тұрғаны түсірілген. Бұл ретте кадрдан шетте тұрып, жағдайды бақылап тұрған Криминалдық полиция басқармасы бастығының орынбасары Ермек Тобылбаев көрінеді. Оқиға барысында жанжалдасып тұрған ер адамдар арасында төбелес басталады. Осы кезде видео аяқталады.
Видео желіде тарағаннан кейін полковник Ермек Тобылбаев оқиғаға қатысты пікір білдіреді. Ол видео қандай жағдайда түсірілгенін айтты.
Назар аударыңыз! Видеода балағат сөздер айтылған.
Посмотреть эту публикацию в Instagram
"Бұл жазба 4 шілдеде түсірілген. Менің ұялы телефоныма Криминалдық полиция басқармасының бақылауында тұрған алаяқтық дерегіне қатысты қылмыстық іске қатысушыдан қоңырау түсті. Маған қалада қылмыстық іске қатысушылардың жиналысы жоспарланғаны айтылды. Заңсыз әрекетті болдырмау әрі мән-жайды анықтау үшін оқиға орнына бардым, сонымен қатар, сол кезде патрульдік полиция полкінің жасағын шақырдым. Оқиға орнына келіп, жағдайды бақыладым. Басында бәрі тыныш болды. Тараптар дау тудырған автокөлік туралы жай сөйлесті. Қатысушылардың бірі екіншісін ұрған кезде, мен шақырған жасақ араласып кетті. Қақтығыстың барлық қатысушысы Полиция бөліміне жеткізілді", - деді Ермек Тобылбаев.
Сондай-ақ, полковник болған оқиғадан кейін ҚР Қылмыстық кодексінің 293-бабы "Бұзақылық" бойынша соталды тергеу басталғанын айтты.
Видеоға қатысты Қарағанды облысы прокуратурасының баспасөз қызметі өкілі де пікір білдірді. Ведомство мәліметінше, Алексей Бондарев 2021 жылғы 30 желтоқсаннан бастап прокуратура органдарында жұмыс істемейді.
Ж. Қадыржанова"Желіде құқық қорғау органдары қызметкерлері жанжалдасқан видео тарады. Видеоға жазылған пікірде Қарағанды облысы прокуратурасының қызметкері А.Е. Бондарев осы оқиғаға қатысқаны айтылған. Қарағанды облысының прокуратурасы А.Е. Бондарев 2021 жылғы 30 желтоқсаннан бастап прокуратура органдарының қызметкері емес екенін хабарлайды", - деп атап өтті ведомство өкілі.