Павлодарлық мектепте мұғалім TikTok-тағы трендті қайталаған оқушыны ұрды, - деп хабарлайды Massaget.kz тілшісі pavlodarnews.kz-ке сілтеме жасап.
Қалалық білім беру бөлімінің мәліметінше, Мақпалеев атындағы мектептің 8-сынып оқушысы сыныптастарымен бәс тігіп, физика сабағы кезінде орындыққа тұрып, TikTok-та тренд болған "Oi oi oi baka" дыбысын қайталап, айқайлады.
"Оқушы мұғалімнің ескертулеріне жауап бермеді. Физика мұғалімі оқушыға күш қолданды. Аталған факті бойынша қызметтік тергеу жүргізілді", - деп хабарлады білім беру бөлімі.
Мектеп әкімшілігі ата-аналармен кездесу өткізіп, оқушымен әңгімелескен. Әйел мен баланың тарапынан шағым болмаған. Мұғаліммен келісімшарт бұзылды. Физика мұғалімі Мақпалеев атындағы мектепте 1 қыркүйектен бастап жұмыс істеген.
Айта кетейік, 2016 жылы "Моя геройская академия" атты аниме-сериал шыққан болатын. Жуырда TikTok-та сериалдың кейіпкері Бакуго Кацуки бөлімдердің бірінде "Oi oi oi baka" деп айтқан сөздерден тренд жасалып, Америка, Испания және басқа да шет елдердің мектептерінде таралды. "Baka" сөзі жапон тілінен ақымақ деп аударылады.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!