Павлодар облысында оқушы "тапаншамен" сыныптасын жарақаттады. 13 жасар бала ауруханаға жатқызылды, – деп хабарлайды Massaget.kz тілшісі pavlodarnews.kz-ке сілтеме жасап.
1 қазанда Железин ауданындағы мектептердің бірінде 5-сынып оқушысы ойыншық тапаншаны сөмкесінен шығарып, сыныптастарына көрсетіп жатқан кезде байқаусызда ойыншық оқты 6-сынып оқушысының көз аймағына тигізген.
Үзіліс уақытында болған оқиға туралы облыстық білім беру басқармасы мәлім етті.
"Аталған факті бойынша дереу қызметтік тергеу ашылды. Нәтижесінде, оқушылар және ата-аналармен әңгіме жүргізілді. Балаларыңызды мектепке жібермес бұрын сөмкесіндегі қалталарда тыйым салынған заттардың бар-жоғын тексеруді сұраймыз!" – деп хабарлады басқарма.
Зардап шеккен оқушы алдымен аудандық ауруханаға, кейіннен облыстық ауруханаға жеткізілді. 13 жасар баланы травматология бөлімшесінің кезекші офтальмолог дәрігері қарап шықты.
"Көз алмасының көгеруі диагнозы қойылды, жағдайы тұрақты", – деп хабарлады облыстық балалар ауруханасы.
Оқушының тұрғылықты жері алыс екенін ескере отырып, динамикалық бақылау үшін офтальмологиялық бөлімшесіне жатқызылды.
Қызықты жаңалықтар мен видеоларды көру үшін TikTok арнамызға жазылыңыз!