Пара бермеуге шақырамыз - ІІМ қазақстандықтарға үндеу жасады

Ішкі істер министрлігі құқықтық тәртіпті және кез келген заңбұзушылық үшін міндетті жазалауды қамтамасыз ету шараларын күшейтті, - деп хабарлайды Massaget.kz тілшісі Polisia.kz-ке сілтеме жасап. 

"Басты қағидат - заң мен тәртіп. ІІМ өзіндік қауіпсіздік департаменті жедел басқару орталықтары мен патрульдік қызметтің жұмысын белсенді қадағалап жатыр. Жедел басқару орталықтары патрульдік полицейлердің жұмысын тәулік бойы бақылауда ұстайды. Қызметкерлер өздігімен сөндіре алмайтын "смартжетондармен" жабдықталған. Бұл құрылғылар белгіленген талаптардан ауытқуға мүмкіндік бермейді, барлық әрекет үнемі жазылып отырады. Бұдан басқа, жасанды интеллект қосылған бейнебақылау камераларынан алынған деректерді талдайтын жүйе қолданылады. Бұл кез келген құқықбұзушылықты анықтауға және оны жедел әшкерелеуге мүмкіндік береді. Полицияның жұмысы әрбір заңбұзушыны оның мәртебесі мен лауазымына қарамастан тиіс жауапкершілікке тартуға бағытталған", - деді ІІМ ресми өкілі Шыңғыс Әлекешев.

Оның айтуынша, ешкімге артықшылық берілмейді. 

"Ешкімге ешқандай артықшылық берілмейді. Патрульдік полицейлер заң талаптарын қатаң түрде сақтайтынын атап өткім келеді. Олардың тарапынан кез келген заңсыз әрекеттер үшін сәйкесінше жауапкершілік көзделген. Біз азаматтарды заңды сақтауға, полицейлердің заңды талаптарын орындауға, лауазымды тұлғаларға пара ұсыну әрекеттеріне бармауға шақырамыз. ІІМ және Сыбайлас жемқорлыққа қарсы қызмет арасында тиісті меморандумға қол қойылғанын еске саламын. Оның аясында жемқорлықпен күрес одан әрі нығая түспек. Егер сiз қызметкерлердің әдепсіз іс-әрекеттерінің куәсі болсаңыз, дереу ІІМ өзіндік қауіпсіздік департаментіне немесе 1402 сенім телефонына хабарласыңыз. Тек бірлесе жұмыс істей отырып, біз қоғамда қауіпсіздікті, құқықтық тәртіпті және әділеттікті қамтамасыз ете аламыз", - деді департамент бастығы - ІІМ ресми өкілі Шыңғыс Әлекешев.

Қызықты жаңалықтар мен видеоларды көру үшін TikTok арнамызға жазылыңыз!