Отбасын енді құрған ерлі-зайыптыларға төрт күндік жұмыс аптасы енгізілмек

Оңтүстік Кореяда отбасын енді құрған ерлі-зайыптылар үшін төрт күндік жұмыс аптасы енгізіледі, – деп хабарлайды Massaget.kz тілшісі 24.kz-ке сілтеме жасап. 

Бұл елдегі демографиялық ахуалды жақсарту үшін жасалмақ. Бұл – әзірге сынақ ретінде қолға алынған жоба. Оған Кёнгидо провинциясындағы 50 компания қатысады. Жұмыс аптасы қысқарғанда, жастардың отбасына көңіл бөлуге уақыты көбеюге тиіс. Қазір елде демографиялық дағдарыс ушығып барады.

Бала туу көрсеткіші төмендеп кеткен, өйткені баспана қымбат. Баланы бағып-қағу шығындары да аз емес. Жастар мансап қуып, сәбилі болуға асықпайды. Осыған байланысты билік отбасын құруға ынталандыратын арнайы бағдарламаларды қолға алып жатыр.

Тіпті жалғызбасты жандарға кездесу ұйымдастырылады. Егер қарым-қатынасын жалғастыратын болса, оларға ақша төлейді. Бұдан бөлек, баспана сатып алу және үй жалдап тұруға да қаржылай көмек бар.

Өзекті жаңалықтарды өз уақытында оқу үшін Facebook парақшамызға жазылыңыз!