Премьер-министр Олжас Бектенов әкімдерге үн қатып, шенеуніктердің алдында тұрған басты міндетті атады, - деп хабарлайды Massaget.kz тілшісі.
Олжас Бектеновтің айтуынша, орталықтағы және жергілікті жерлердегі басшылардың басты міндеті инвестиция тарту болуы қажет.
"Ертең тағы кімді тарта аламын, тағы қандай жоба бар деген оймен ұйықтап, сол оймен ояну керек. Осындай ойды санаға мықтап бекіту керек. Ең бірінші кезекте осы көрсеткіш бойынша сіздерді бағалаймыз. Күнделікті міндеттер бары түсінікті, олар ешқайда кетпейді. Бірақ стратегиялық міндет - инвестиция тарту. Экономиканың дамуы, елдің бәсекеге қабілеттілігі осыған байланысты", - деді премьер-министр.
Үкімет басшысы Үкімет аппаратындағы өңірлік инспекторлардың жұмысын тиісінше қайта құрғанын мәлімдеді: енді олар тек инвестициялар тартумен айналысады.
"Маған басқа анықтамаларды жазудың қажеті жоқ. Әкіммен бірге осы жұмыспен айналысу керек. Бір жоба басқа жаққа кетсе, бұл үшін барлығы белгіленген тәртіппен жауап береді", - деп ескертті Бектенов шенеуніктерге.
2025 жылғы 28 қаңтардағы Үкіметтің кеңейтілген отырысында Мемлекет басшысы Қасым-Жомарт Тоқаев экономикаға қосымша инвестициялар тарту қажет екенін айтып, оны Үкіметтің басым міндеті деп атады.
Қызықты жаңалықтар мен видеоларды көру үшін TikTok арнамызға жазылыңыз!
Ж. Қадыржанова