Олимпиада марапаты сатылатыны рас па? Министрлік жауап берді
![Олимпиада марапаты сатылатыны рас па? Министрлік жауап берді](/userdata/news/news_102662/image_l.jpg)
Telegram-арналардың бірінде ақылы олимпиада туралы тағы бір ақпарат шықты. Онда байқаудың марапаттау рәсімі ақылы түрде өтетіні, құны 25 мың теңге тұратыны айтылады. Massaget.kz тілшісі осы ақпаратқа байланысты Оқу-ағарту министрлігінің баспасөз қызметіне жүгінді.
Тараған ақпаратта 25 мың теңгеге оқушының өзіне дипломдар, төсбелгілер берілетіні, оған қоса дайындаған мұғаліміне, ата-анасына алғыс хат жіберілетіні жазылған. Демек, марапаттың бәрін оқушы "сатып алуы қажет".
Kozachkov Telegram-арнасы
Kozachkov Telegram-арнасы
Марапаттау рәсімі Астана қаласында жоспарланған екен. Ал төлем уақытын 15 наурызға дейін деп белгілеген.
Оқу-ағарту министрлігінің баспасөз қызметі мәліметінше, Қазақстанда ресми түрде ауыл оқушыларына өткізілетін бірнеше олимпиада бар.
- Ауыл мектептерінің 9-11(12)-сынып оқушыларына арналған жалпы білім беретін пәндер бойынша республикалық олимпиадасы;
- Ауыл мектептеріне арналған "Мың бала" Ұлттық зияткерлік олимпиадасы;
- IQanat Олимпиадасы.
Тізімдегі бұл олимпиадалар тегін өткізіледі екен. Ал ішінде әлеуметтік желіде тарап жүрген "Дарынды 1000 бала" атты республикалық байқау жоқ.
"Ауыл оқушылары арасындағы "Дарынды 1000 бала" олимпиадасы №514 бұйрыққа енбеген және ресми іс-шара емес екендігін хабарлаймыз. Облыстық білім басқармаларына мұғалімдер мен ата-аналарға түсіндіру жұмыстарын жүргізу тапсырылды. Сондай-ақ, "Дарын" республикалық ғылыми-практикалық орталығы бұл компанияның одан әрі қызметіне жол бермеу үшін тиісті шараларды қолға алмақ", - деп жауап берді министрлік өкілі Massaget.kz-ке жауабында.
Еске салайық, бұған дейін де министрлік өкілдері мектепте өткізілетін ақылы байқаулар мен шаралар қаншалық заңды екеніне жауап берді.
Instagram парақшамызға жазылып, ең қызықты ақпараттарды бірінші болып оқыңыз!
Ж. Қадыржанова