Нұрлан Ұранхаев Семейде қандай өзгерістер болатынын айтты

Орталық коммуникациялар қызметінің көшпелі баспасөз конференциясында Абай облысының әкімі Нұрлан Ұранхаев Семей қаласын дамыту жоспары туралы айтып берді, - деп хабарлайды Massaget.kz тілшісі.

Мемлекет басшысының тапсырмасына сәйкес, Семей қаласын дамытудың бас жоспары әзірленіп жатыр. Бас жоспардағы алғашқы жобалардың бірі – қаланың сол жағалауындағы ескі тұрғын үйлердің орнына жалпы ауданы 72 гектар болатын жаңа шағын аудан салу.

"Былтырдан бастап 35 ауланы абаттандыру бойынша жоспарлы жұмыс басталды. Биыл тағы 70 аула аумағын, сондай-ақ 15 қоғамдық кеңістікті абаттандыру жоспарланды. Олардың бірінде татар ақыны Муса Жалилға бюст орнатуды көздеп отырмыз, сонымен бірге Қазан қаласында Абай Құнанбаевқа ескерткіш орнату жоспарланған", - деді облыс басшысы.

Ол қаланы көгалдандыру бағдарламасы қоғамдық демалыс орындарын ретке келтіруден басталатынын айтты, сондықтан жасыл желектерді күту үшін жергілікті суару жүйесінің бірыңғай схемасы жасалады.

Сонымен қатар 60 шақырым жол жөнделіп, жаяу жүргіншілер жолдары да жабдықталады. Қаланың сәулеттік келбетін реттеуге, оның архитектуралық бірегейлігін қалпына келтіруге неғұрлым біртекті тартымды қалалық ортаны құруға мүмкіндік беретін бірыңғай дизайн құру жоспарланып отыр. Қазір көппәтерлі тұрғын үйлердің қасбеттеріне жөндеу жұмыстары жүргізіліп жатыр.

"Біз қала тұрғындарына уәде еткеніміздей, екінші көпірдің астындағы кеңістікті жабдықтай бастадық, көп нәрсе жоспарланған және осы құрылыс маусымында мұның бәрін жасауға тырысамыз. Біздің арал бойынша ұсыныс бар, оны азаматтарымыздың демалыс орнына айналдыру керек. Ескі балалар жолын қайтаруды жоспарлап отырмыз, біз осы бағытта жұмыс істей бастадық. Егер бізде уақыт болса, мен осы жылы аралға жаңа жаяу көпір салуды бастаймыз деп үміттенемін", - деді Нұрлан Ұранхаев.

Сонымен қоса Астананың үлгісімен қала көшелерінің бірін жаяу жүргіншілер көшесіне айналдыру жоспарланып отыр.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!