Нұрбек Оралбай ұлттық құрамадағы жаттығуына қашан оралады?

Бокстан Қазақстан ұлттық құрамасының бас жаттықтырушысы Қайрат Сәтжанов команданың алдағы жоспары мен Нұрбек Оралбайдың жаттығу жиындарына оралуы жайлы ҚР ҰОК сайтына берген сұхбатында айта кетті, - деп жазады massaget.kz. 

Париж Олимпиадасында күміс жүлдегер атанған Нұрбек Оралбай алдағы жаттығу жиындарында қатарға қосылады. Ол мұрын қуысына ота жасатқан еді. Тезірек сауығып, қатарға қосылады. 

Ұлттық құраманың алғашқы оқу-жаттығу жиыны 13-31 қаңтар аралығында өтеді. Команда Түркістан облысындағы Alma-Tau базасында оқу-жаттығу жиындарын өткізеді. Жоспарға жалпы дене дайындығы (ОФП) мен арнайы дене дайындығы (СФП) кіреді. Жиынға бірінші, екінші, үшінші және төртінші нөмірлі боксшылар шақырылады.

25 қаңтарда екі құрам Испанияға аттанып, бір апталық жиын өткізеді. Осы жиыннан кейін, 3-9 ақпан аралығында турнирге қатысады. Қалған екі құрама Түркістан облысындағы оқу-жаттығу жиындарын жалғастырады. Бұл жиын аяқталған соң, олар Болгарияға жол тартады. Болгарияда "Странджа Кубогы" атты ірі халықаралық турнир өтеді. Бұл турнирге көптеген жетекші ұлттық құрамалар қатысады. Болгарияда да басқа құрамалармен бірлескен оқу-жаттығу жиындарын өткіземіз, ал 23 ақпанда жарыс басталады. Биылғы басты жарыстар - екі әлем чемпионаты және құрлықтық біріншілік, - дейді бас жаттықтырушы. 

Айта кетейік, Қазақстан құрамасы 2024 жылды Чианг Мэйдегі Азия чемпионатымен аяқтады. Одан кейін Қарағандыда ел чемпионаты өтті.