Несиені мерзімінен бұрын толық өтеген азаматқа сақтандыру сыйлықақысының пайдаланылмаған кезеңге тиесілі бөлігі қайтарылуы мүмкін. Қанша қаражат алуға болады, қайда өтініш беру керек және ақша қандай мерзімде төленуге тиіс? Бұл сұрақтарға Қаржы нарығын реттеу және дамыту агенттігі жауап берді, деп хабарлайды Massaget.kz.
Сақтандыру ақшасы кімге қайтарылады?
Бұл мүмкіндік банк несиесімен немесе микрокредитпен бірге ерікті сақтандыру шартын рәсімдеген және кредитор алдындағы міндеттемесін мерзімінен бұрын толық орындаған жеке тұлғаларға қатысты. Мысалы, қарыз алушының өмірі мен денсаулығын немесе кепілдегі мүлікті сақтандыру шарты болуы мүмкін.
Қаражатты алу үшін қарыз алушы сақтандыру компаниясына өзі хабарласып, шартты бұзу және сақтандыру сыйлықақысының бір бөлігін қайтару туралы өтініш беруі керек. Ақша автоматты түрде қайтарылмайды.
Қанша ақша қайтаруға болады?
Агенттік мынадай мысал келтірді: несие мен сақтандыру бес жылға рәсімделді, полис құны – 150 мың теңге. Қарыз алушы несиені бір жылдан кейін толық өтеді.
Сақтандыру қолданылған бір жылға 30 мың теңге тиесілі. Ал аяқталмаған төрт жыл үшін 120 мың теңге қалады. Сақтандыру компаниясы шартты бұзуға кеткен шығынды осы сомадан ұстай алады. Бірақ ол бүкіл сақтандыру сыйлықақысының 10 пайызынан, яғни бұл мысалда 15 мың теңгеден аспауға тиіс.
Егер компания рұқсат етілген ең жоғары соманы ұстаса, қарыз алушыға 105 мың теңге қайтарылады. Ал нақты шығын аз болса, төлем мөлшері 120 мың теңгеге дейін жетуі мүмкін.
“ Сақтандырушы өтінішті алған сәттен бастап бес жұмыс күні ішінде сақтандыру қолданылған уақытқа сәйкес келетін бөлік пен шығындарды шегеріп, қалған сақтандыру сыйлықақысын жеке тұлғаға қайтаруға міндетті.Қаржы нарығын реттеу және дамыту агенттігі
Қайда жүгіну керек?
Өтініш тікелей сақтандыру компаниясына беріледі. Өтініш беру тәртібі мен қажетті құжаттар тізімі сақтандыру ережесі және шарт талаптарымен айқындалады.
Сақтандыру компаниясы бас тартса не істеу керек?
Егер сақтандыру компаниясы ақшаны қайтарудан бас тартса, жауап бермесе немесе тиесілі сомадан аз қаражат төлесе, Қаржы нарығын реттеу және дамыту агенттігіне жүгінуге болады.
Өтінішке несие және сақтандыру шарттарын, несиенің толық өтелгенін растайтын құжатты, сақтандыру компаниясына берілген өтінішті және компанияның жауабын, егер ол бар болса, қоса тіркеу қажет.
- сақтандыру сыйлықақысын қайтарудан бас тартуға;
- төлем сомасымен келіспеуге;
- ақшаның кешіктірілуіне;
- сақтандыру талаптары туралы ақпараттың жеткіліксіздігіне.
Қысқаша әрекет реті
Банктен немесе микроқаржы ұйымынан растайтын құжат алыңыз.
Шартты бұзып, пайдаланылмаған кезең үшін ақшаны қайтаруды сұраңыз.
Өтініш алынған күннен бастап төлем осы мерзімде жасалуға тиіс.
Өтінішіңізді және барлық растаушы құжатты тіркеңіз.
Ескерту: қайтарылатын нақты сома сақтандыру шартының қолданылған мерзіміне, шарт талаптарына және сақтандыру компаниясының құжатпен расталған шығындарына байланысты есептеледі.
О. Сансызбай