"Некесіз туған бала": әнші Бейбіт Қорған тапсырған ДНҚ-ның қорытындысы шықты

Атыраулық әйел Нұргүл Зиханова танымал әнші Бейбіт Қорғаннан бала туғанын айтып, "Астарлы ақиқат" бағдарламасына жүгінген еді. Кейін өнер иесі ДНҚ сараптамасын тапсыруға мәжбүр болды. Әнші сараптама қорытындысы шыққанын, баланың әкесі емесін айтты, - деп хабарлайды Massaget.kz тілшісі.

"Достар, азаматша Нұргүл Зиханова үстімнен Атырау облысының сотына арыз жазып, КТК телеарнасының "Астарлы ақиқат" бағдарламасында мені баланың әкесі деп заңсыз айыптаған болатын. Осыған байланысты қазір ДНҚ сараптамасының қорытындысы шықты", - деп жазды әнші Instagram-парақшасына.

Ал оның қорғаушысы Орынгүл Ұзаққалиева Бейбіт Қорғанға "тағылған жалаға" қатысты пікір білдірді. 

"Халықтың көкейінде жүрген сұрақтарға жауап бергім келіп отыр. Мен - Атырау облысы қорғаушылар алқасының қорғаушысы, адвокат Орынгүл Ұзаққалиева. Бұл азаматтық іс бойынша келісімшарт негізінде әншінің адвокаты ретінде сотқа қатысқан едім. Азаматша Нұргүл Зиханова Атырау облыстық кәмелеттік жасқа толмағандар ісі жөніндегі мамандандырылған ауданаралық сотқа баланың әкелігін анықтау және алимент өндіру ісі бойынша арыз түсірді. Сот ұйғарымы бойынша, 24 қаңтарда 2024 жылы Бейбіт Қорған арнайы келіп, сот-биологиялық үлгілерін тапсырды. 27 ақпанда сот үстінде, барлық қатысушының көзінше сараптама нәтижесі ашылып, қорытындысы оқылды. Бейбіт Қорған баланың әкесі болып шықпады", - деді ол.

Адвокаттың айтуынша, арызданушы Нұргүл Зиханова арызды қайтарып алған. 

Сол себепті арызданушы Нұргүл Зиханова арызды қайтарып алып, қараусыз қалдыруды сұрады. Сот бұл өтініш бойынша, талап арызды қараусыз қалдырып, Нұргүл Зихановаға сот шығындарын төлеуді міндеттеді. Біз жеке сараптамалық орталыққа бармай, сот тағайындаған мекемеде сараптамадан өтуге заңды және күмәнсіз қорытынды алу үшін келістік. Соттың түпкілікті шешімі шықпай жатып "Астарлы ақиқат" бағдарламасының қатысушылары Бейбіт Қорғанның тегіне, ар-намысына нұқсан келтіретін сөздер айтты. Бұған байланысты бағдарламаны алдағы уақытта арнайы сараптамадан өткіземіз. Менің қорғауымдағы азаматтың қызметтік беделіне, атына кір келтіргені анықталса және жеке өмірінің құпиялығы анықталса заңды түрде мәселені шешеміз. Бейбіт Қорғанның тілшілер сауалына жауап бермеуі – сот шешімінің түпкілікті нәтижесін күту болатын", - деді әншінің қорғаушысы.

Посмотреть эту публикацию в Instagram

Публикация от Бейбіт Қорған (@beibitkorgan)

Еске салайық, бұған дейін атыраулық Нұргүл Зиханова 5 жыл бұрын Бейбіт Қорғанмен көңіл жарастырғанын айтқан еді. Оның сөзінше, 4 жасар баласы - әншінің ұлы.

"Әкесі ретінде 100 пайыз қабылдаған адам - Бейбіт Қорған. Ол мойындамаса да, дәлелденсе, балаға жауапкершілікті алсын деймін. Маған одан ештеңе керек емес", - дейді ол. 

Кейін өнер иесі ДНҚ тапсырды. Бұл туралы "Астарлы ақиқат" бағдарламасының бұрынғы жүргізушісі Дина Төлепберген айтты.

"Астарлы ақиқатты" жүргізуді тоқтатсам да, бұл мәселе тұрақты бақылауымда. ДНҚ алу үшін ақыры оны сотқа сүйредік. Оның қан тапсыруға қалай келгенін көрсеңіз, шошисыз. Құдды бір отадан шыққан Майкл Джексондай, "Маска" шоуы маңырап қалады. Ауыр диагноздағы бала жайлы бірдеңе айтар ма деп едік, ләм-мимсіз ұзатылып жатқандай артына қайырылмай кетті. Бізден қашса да, ақыры Атырауда заң аясында Бейбіт Қорған өз қанын тапсырды", - деді ол.

Instagram парақшамызға жазылып, ең қызықты ақпараттарды бірінші болып оқыңыз!