Жезқазған тұрғыны мектеп мұғалімін ұлын ұрды деп айыптады. Оның айтуынша, жарақаттан кейін балада гидроцефалия пайда болған, - деп хабарлайды Massaget.kz тілшісі.
Қарағандылық әйелдің ұлы Жезқазғандағы мектептердің бірінде тоғызыншы сыныпта оқиды. 16 қазанда оқушының анасы география мұғалімінің ұлын ұрып-соққанын білген. Жарақаттың салдарынан жасөспірімде үнемі бас ауруы мен гидроцефалия пайда болған, дейді анасы.
"Жұмыстан үйге келе жатыр едім, ұлым телефон соғып, тез келуімді өтінді. Өзін біртүрлі сезінгенін айтты. Мен жеткенше қорқып, дірілдеп кетіпті. Үйде ол күні бойы не болғаны есінде жоқ екенін, қатты қорыққанын, құсқанын айтты. Содан кейін олар сыныптасына хабарласқан. Ол баламның география пәнінің мұғалімімен жанжалдасып қалғанын айтты. Мұғалімнің ұлымның басынан ұрғанын білдік", - дейді оқушының анасы.
Сол күні кешке бала сәл есін жиған кезде ата-анасы жанжалдың мән-жайын анықтауға тырысқан. Бірақ ұлы оның есінде ештеңе жоғын айтқан. Бұл ретте бас ауруына шағымданады. Ата-анасы жедел жәрдем шақырып, оқушы Жезқазған көпсалалы ауруханасына жеткізілген.
"Тексеру кезінде нейрохирургия бөлімінің дәрігері баламның миы шайқалғанын, ауруханаға жатқызу керек екенін айтты. Ұзақ уақыт емделу керегін айтты, бірақ үшінші күні ұлымды шығарды. Олар миы шайқалмағанын, оның сау екенін айтты. Астанада толық тексеруден өттік, ол ұлымыздың жарақаттан кейінгі гидроцефалиямен ауыратынын көрсетті. Бізге ем тағайындалды және стресстік жағдайлардан және физикалық белсенділіктен аулақ болуға кеңес берді. Енді үш ай сайын бақылауға баруымыз керек", - дейді жасөспірімнің анасы.
Оқиғадан кейін, анасының айтуынша, жасөспірімнің басы жиі ауырған. Ол тез шаршайды. Баланың анасы ауыр жағдайдың география мұғалімінің соққысына тікелей байланысты екеніне сенімді.
"Осы уақыт ішінде мұғалім бірде-бір рет келмеді, ұлымыздың хал-жағдайын білмеді, кешірім сұрамады. Сонымен қатар, ол мектепте жұмыс істеп жүр. Полицияның жұмысына да шағымымыз бар. Қандай да бір себептермен сот-медициналық сарапшылар астаналық дәрігерлерден анықтамаларымызды алмаған. Нәтижесінде, тексеру тек жезқазғандық дәрігерлердің қорытындысы негізінде жүргізіліп, балада дене жарақатын анықтаған жоқ. Қылмыстық істің орнына әкімшілік іс қозғалды. Мен адвокат жалдадым, қазірдің өзінде жезқазғандық дәрігерлердің, полиция және білім беру қызметкерлерінің, сондай-ақ бала құқықтары жөніндегі уәкілдің әрекетіне шағым түсірдік", - деп қосты оқушының анасы.
Ұлытау облысының білім басқармасы мектепте қызметтік тексеру жүргізілгенін айтып, шағымға қатысты пікір берді. География пәнінің мұғаліміне сөгіс жарияланды. Оның ары қарайғы жұмысы туралы шешім сот отырысы аяқталғаннан кейін қабылданды.
"Мұғалім бір айға жұмыстан шеттетілді, бірақ 13 қарашада 11-сынып оқушыларының өтініші бойынша және жедел қажеттілікке байланысты қызметіне қайта оралды. Ол тоғызыншы сыныпқа сабақ бермейді, географиядан басқа мұғалім сабақ береді. Қазіргі уақытта дерек бойынша сот процесі жүргізіліп жатыр", - деп хабарлады білім басқармасының баспасөз қызметі.
Ұлытау облыстық денсаулық сақтау басқармасы жеткіншектің Жезқазған көпсалалы ауруханасына түскенін растады.
Ұлытау облыстық Полиция департаментінің баспасөз қызметі сот-медициналық сараптама жәбірленушіден ешқандай дене жарақатын анықтамағанын баса айтты. Осыған байланысты, ҚР ӘҚБтК-нің 73-2-бабы 1-бөлігі бойынша әкімшілік іс қозғалды. Іс материалдары сотқа жіберілді.
Бұл жағдайда сот баланың денсаулығына зиян келтiрiлген-келмегенiн анықтауы тиiс қайта сот-медициналық сараптамасын тағайындады.
Қызықты жаңалықтар мен видеоларды көру үшін TikTok арнамызға жазылыңыз!