Назарбаев университеті жатақханасынан мәйіті табылған студент қыздың өліміне қатысты ғылым және жоғары білім министрі Саясат Нұрбек пікір білдірді, - деп хабарлайды Massaget.kz тілшісі.
Министрдің айтуынша, полиция бұл істі Қылмыстық кодекстің 105-бабы бойынша ("Өз-өзіне қол жұмсауға дейін жеткізу") тергеп жатыр.
"Қылмыстық-процестік кодекс аясында ешқандай мәліметтер жарияланбайды. Тек полициямен бірлесіп жұмыс істеп жатқанымызды растай аламыз", – деді министр.
Журналистер министрден "Оқиға студенттер арасындағы жанжал салдарынан болуы мүмкін бе?" - деп сұрады.
"Ештеңе айта алмаймыз. Тергеу аясында қосымша ақпаратты Полиция департаменті береді деп келісілген", – деді шенеунік.
Айта кетейік, 18 маусымда Назарбаев университетінің студенті жатақханадан өлі табылды. Университеттің баспасөз қызметі қыздың отбасы мен жақындарына көңіл айтты.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова