Нағыз бауыр осындай болады - Әзербайжан президенті Қазақстанға алғысын білдірді

Әзербайжан президенті Қазақстанға алғысын білдірді, - деп хабарлайды Massaget.kz тілшісі.

29 желтоқсанда Ильхам Әлиев Әзербайжан телеарнасына халықаралық әуежайда сұхбат беріп, Ақтау маңындағы ұшақ апатына қатысты пікір білдірді.

"Бірінші кезекте Президент Тоқаевқа алғысымды білдіру үшін қоңырау шалдым. Біз апаттан кейін қазақстандық құтқарушылар оқиға орнына жедел жетіп, қираған ұшақтан адамдарды шығара бастағанын білдік, ақпарат алдық", - деді ол.

Ильхам Әлиев құтқарушылар өз өмірлеріне қауіп төндіргенін айтты.

"Олар тағы бір жарылыс болып-болмайтынын білмеді. Ұшақтың бір бөлігі өртеніп кетті, ал өрт басқа бөлікке таралуы мүмкін еді. Бірақ соған қарамастан олар нағыз ерлік көрсетті. Сондай-ақ медициналық қызметкерлердің әрекеттерін де атап өткім келеді. Жараланған жолаушылар дереу медициналық мекемелерге жеткізілді. Сондықтан Президент Тоқаевқа алғысымды білдірдім", - деді президент Әлиев.

"Біздің қазақстандық бауырларымыздың ынтымақтастығы Әзербайжан халқының жүрегінде үлкен із қалдырды", - деді президент Ильхам Әлиев.

Ол Қазақстанның қарапайым азаматтары Әзербайжанның Ақтаудағы консулдығына келіп, гүл шоқтарын қойып, көңілге демеу болғанын айтты.

"Міне, шынайы достық пен бауырластық. Сонымен қатар Президент Тоқаевпен әңгімелесу барысында Әзербайжанның тергеу бойынша ұстанымын баяндап, біз халықаралық сараптаманы қолдайтынымызды, бірақ бұл істі мемлекетаралық авиация комитетінің қарауына бере алмайтынымызды айттым. Ол бұл ұстанымды түсіністікпен қабылдады. Әрине, біздің мемлекеттік құрылымдардың өкілдері, комиссия мүшелері, басшылар, сондай-ақ прокуратура өкілдері үнемі байланыста. Қазақстан өз кезегінде мемлекеттік комиссия құрды, бұл туралы Президент Тоқаев әңгімелесу барысында айтты", - деді Әзербайжан президенті.

Ақтаудағы ұшақ апаты туралы не белгілі?

Еске салайық, 25 желтоқсанда Ақтау маңында Бакуден Грозныйға ұшып бара жатқан ұшақ апатқа ұшырады. Бұл - Azerbaijan Airlines әуекомпаниясына тиесілі Эмбраер 190 ұшағы. Алдын ала ақпарат бойынша ұшақ бортында 67 адам, оның ішінде 5 экипаж мүшесі болған.

Кейінірек Қазақстанның Төтенше жағдайлар министрлігі өкілдері оқиға орнына барды. Құтқарушылар жеткен кезде ұшақ жанып жатқан.

Қазақстанның Көлік министрлігі де төтенше жағдайға байланысты мәлімдеме жасады. Ал әлеуметтік желіде оқиға орнынан видеолар тарады.

Кейінірек ТЖМ оқиға орнындағы өрт сөндірілгенін хабарлады. Маңғыстау облысының әкімі Нұрдәулет Қилыбай ұшақ апаты болған жерге барды. 

Көлік министрлігі ұшақ бортында болған адамдар жөнінде алдын ала мынадай ақпарат жариялады: бортта 37 Әзербайжан, 6 Қазақстан, 3 Қырғызстан, 16 РФ азаматы болған.

Президент Қасым-Жомарт Тоқаевтың тапсырмасымен ұшақ апатына қатысты комиссия құрылды. Комиссия құрамына премьер-министрдің орынбасары, Маңғыстау облысының әкімі, төтенше жағдайлар, көлік, сыртқы істер, ішкі істер, еңбек және халықты әлеуметтік қорғау, денсаулық сақтау министрліктерінің басшылығы, Бас көлік прокуроры кірді.

Көліктегі Полиция департаменті төтенше жағдайға байланысты қылмыстық іс қозғады.

Маңғыстау облыстық Денсаулық сақтау басқармасының алдын ала мәліметі бойынша 4 адам қаза тапқаны расталған.

Ақтау маңындағы ұшақ апатынан аман қалғандардың видеосы тарады.

Ал Azerbaijan Airlines жолаушылардың тізімін жариялады. Аман қалған 29 адам бар, оның ішінде 2-еуі - бала.

Ақтаудағы ұшақ апатына қатысты Бас прокуратура мәлімдеме жасап, оқиға орнына елдің Бас көлік прокуроры барғанын хабарлады. Қылмыстық іс Қазақстан Республикасы Бас прокурорының ерекше бақылауында.

Мемлекет басшысы Қасым-Жомарт Тоқаев Әзербайжан президенті Ильхам Әлиевке көңіл айтып, мемлекеттік комиссия тиісті шаралар қабылдап, Әзербайжан тарапына көмек көрсететінін мәлімдеді.

Instagram парақшамызға жазылып, ең қызықты ақпараттарды бірінші болып оқыңыз!