Мобильді қызметтің мүмкіндігі кең

Қазақстанда мемлекеттік қызметті алудың 3 негізгі арнасы бар: «Электронды үкімет» порталы, «Азаматтар үшін үкімет» мемлекеттік корпорациясы, Мемлекеттік қызметтерді көрсету мәселелері бойынша бірыңғай байланыс орталығы. 

«Бүгінде мемлекеттік қызмет тізілімінде 739 қызмет бар, оның 530-ын «электронды үкімет» және мемлекеттік корпорация арқылы алуға болады.  Жыл соңына дейін көрсетілетін қызметтер саны 80% артып, 583 мемлекеттік қызметті құрайтын болады», – деді статистикалық мәліметтерді келтірген Д. Абаев.

Министр барлық мемлекеттік қызметтерді алу үшін азамат 1414 бірыңғай нөміріне қоңырау соғып, кеңес ала алатынын еске салды.

Сондай-ақ ол «электронды үкіметтің» қалып­тасқан инфрақұрылымының арқасында жыл сайын мемлекеттік органдар мемлекеттік қызметтерді электронды формаға ауыстыру, азаматтардың түрлі инстанциялар талап ететін құжаттар мерзімдері мен санын азайту бойынша шаралар қабылданып жатқанын хабарлады.   Мәселен, бүгінде портал пайдаланушылары 5,5 млн. адамнан астам, немесе ол Қазақстанның белсенді халқының 61% құрайды.  

Азаматтар үйден шықпай-ақ электронды форматта: неке қию, бала туу, баланың тууына байланысты жәрдемақы, балабақшаға кезекке тұру, «Болашақ» стипендиясы бойынша шетелдік университеттерге түсу, мемлекеттік қызметке тұру үшін тестілеуден өтуге өтінім беру, коммуналдық қызметтерге, ұялы байланыс қызметіне төлем жасау, зейнетақы аударымдарын тексеру, кредиттік тарих мониторингі сияқты қызметтерді ала алады. 

Д.Абаев сонымен қатар көрсетілетін қызметтерді мобильдік қызметке аудару жұмыстары жүргізіліп жатқандығы туралы айтты. «Қазір 83 түрлі қызмет пен сервис жүзеге асырылды. Мобильдік технологиялардың енгізілуімен құжаттарды ауыстыру, айыппұлды төлеу, техникалық тексеруден өту т.с.с. туралы хабарламаларды тек жеке кабинетке немесе электронды адреске ғана емес, SMS-хабарламалар арқылы жіберу мүмкіндігі туды», – деп қосты министр.

Мемлекеттік көрсетілетін қызметтерді оңтайлан­дыру және автоматтандыру жұмыстарын жүргізу қыз­меттерді көрсету мерзімін, мемлекеттік қызметті алу үшін ұсынылатын құжаттар тізімін қысқартуға, сонымен қатар сыбайлас жемқорлыққа қарсы үлкен кедергі орнатуға жол ашпақ. 

Министр атап өткендей, қазірде «Сандық Қа­зақстан» мемлекеттік бағдарламасын әзірлеу бойынша жұмыстар жүргізіліп жатыр. Бұл бағдарламаның мақсаты – сандық экожүйені жеделдете дамыту арқылы халықтың өмір сүру сапасын арттырып, Қазақстан экономикасының бәсекеге қабілеттілігін көтеру болып табылады. Аталған бағдарлама аясында электронды үкіметті әрі қарай дамыту, мемлекеттік қызметтердің көрсетілу сапасын, оның ішінде «мемлекеттік органдар архитектурасын» құру, ашық үкіметті дамыту, мәліметтерді басқару жүйесін енгізу, Қазақстанның ауылдық елді мекендерін кең жолақты ғаламтормен қамтамасыз ету арқылы арттыру жоспарланып отыр. Бұл ретте 2020 жылға қарай ғаламторды қалалықтардың 85%, ауылдықтардың 75% пайдаланатын болады.

Ботагөз ӘБДІРЕЙҚЫЗЫ

Дереккөз: economics.kazgazeta.kz