Министрлік төрт түлікке чип тағып, есепке алуды ұсынды
![Министрлік төрт түлікке чип тағып, есепке алуды ұсынды](/userdata/news/news_82375/image_l.jpg)
Ішкі істер министрлігі өкілдері мал ұрлығының алдын алу мақсатында ауыл шаруашылығы жануарларын чиптеуді ұсынады. Бұл туралы орталық коммуникациялар қызметінде өткен брифингте ІІМ Тергеу департаментінің басқарма басшысы Ермек Шүлден айтты, - деп хабарлайды Massaget.kz тілшісі "Астана" телеарнасына сілтеме жасап.
"Ең өткір проблемалардың бірі - есірткінің жаңа түрлерін шығару және оларды тікелей байланыссыз сату тәсілдері арқылы жасырын сипат алған есірткі қылмысымен күрес", - деді Ермек Шүлден.
Оның айтуынша, бұл мәселелерді шешу үшін министрлік мына бастамаларды ұсынып отыр:
- мектептерде және жоғары оқу орындарында кәмелетке толмағандарға скрининг қолдану арқылы есірткі пайдалану деректерін ерте анықтау жүйесін енгізу;
- жеке емхана, жедел жәрдем, аурухана, сондай-ақ, салауатты өмір салты мен ЖИТС орталықтарын тарта отырып, нашақорлардың шынайы есебін шығару;
- сот сараптамасы органдарын материалдық-техникалық жарақтандыру;
- кеден және шекара қызметтерi органдарын қазiргi заманғы инспекциялық жабдықпен жарақтандыру.
"Сонымен қатар, барлық қылмыстың 90 пайызы - ұрлық пен мал ұрлығының жасалу себептері мен шарттарын жою шаралары қабылданады. Атап айтқанда, ауыл шаруашылығы жануарларын чиптеу негізінде мал басын есепке алуды енгізу, иесіз малға арналған қоралар жасау, ет өнімдерін өткізуге арналған жасырын сауда орындарын анықтау және жабу. Бұлардан өзге, байланыс операторларының ұрланған мобильді құрылғыларды бұғаттау, ұрланған заттарды, әсіресе ломбардтарда, комиссиялық дүкендерде сату тәртібін бақылау. Мұның барлығы Цифрландыру, Ауыл шаруашылығы, Сауда министрліктерімен, бизнес қауымдастықпен, ұялы байланыс операторларымен және әкімдіктермен өзара әрекеттесу барысында жүзеге асырылады", - деп түйіндеді Ермек Шүлден.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
С. Бөлек