Кейінгі кезде ChatGPT қазақстандықтардың өміріне дендеп еніп кетті. Massaget.kz тілшісі Оқу-ағарту министрлігінен оқушылардың жасанды интеллектіні қолдануына қандай да бір шектеу енгізіле ме деп сұрады.
Депутат Магеррамовтың мәлімдемесі
Былтыр жыл аяғында Мәжіліс депутаты Магеррам Магеррамов оқушылар ChatGPT-дің көмегіне әбден жүгініп алғанын, сондықтан өздері ойланбайтынын айтты.
"Бүгінде ChatGPT танымал болып келеді, ол мектеп бағдарламасын, жаттығуларды шешуге, романдардың қысқаша мазмұнын жазып беруге қауқарлы. Бұл тәсіл сыни тұрғыдан ойлау қабілетін төмендетеді, алған білімге теріс әсер етеді, салдарынан маңызды шешімдерді өз бетінше қабылдау қиындайды. Бұл қарқынмен еліміз зияткерлік әлеуетін жоғалтады. Тез әрекет ете алмайтын, өмірдегі күрделі міндеттерді шеше алмайтын ұрпақ тәрбиелейміз", - деді депутат.
Видео кадры
Магеррамовтың сөзінше, жуырда Еуропалық Парламент жасанды интеллектіні пайдалануды шектейтін заң қабылдаған. Аустралия мен АҚШ-тың кейбір штаттарында да әлеуметтік желіні пайдалануда жас шектеулерін қарастыратын заңдар қабылданған. Депутат Қазақстан да шұғыл шара қабылдау керек деген пікірде.
Министрліктің пікірі
Оқу-ағарту министрлігі Massaget.kz-ке берген жауабында бұл мәселе зерттеліп жатқанын айтты.
"Білім беру жүйесінде жасанды интеллект құралдарын, соның ішінде ChatGPT сияқты технологияларды қолдану мәселесі білім беру бағдарламаларында қарастырылмаған. Білім беру саласында жасанды интеллектінің әлеуеті мен мүмкіндіктері әлі де зерделеніп жатыр. Бұл мәселе бойынша шешім қабылданған жағдайда жарияланады", - деп жазылған жауапта.
ChatGPT туралы не белгілі?
ChatGPT - OpenAI компаниясы әзірлеген, әртүрлі тілде диалог арқылы жұмыс істеуге қабілетті, генеративті жасанды интеллектке негізделген чат-бот. Жүйе сұрақтарға жауап бере алады, әртүрлі тілдерде мәтіндер жазып, суреттер ұсына алады.
Өзекті жаңалықтарды өз уақытында оқу үшін Facebook парақшамызға жазылыңыз!
Ж. Қадыржанова