Министрдің орынбасары ұнның неге қымбаттап жатқанын білмейді
![Министрдің орынбасары ұнның неге қымбаттап жатқанын білмейді](/userdata/news/news_92805/image_l.jpg)
Сауда және интеграция вице-министрі Қайрат Төребаев елімізде ұнның неге қымбаттап жатқанын түсіндіре алмады, - деп хабарлайды Massaget.kz тілшісі.
Ол журналистерге бұл салаға жетекшілік етпейтінін, нанның бағасын нарық реттейтінін айтты.
"Сіз ішкі саудаға қатысты сұрақ қойып тұрсыз. Қазақстанда - нарықтық экономика. Ұнның барлық экспорттаушы-өндірушілері өнімді экспорттау немесе елдің ішінде сату туралы шешімді өздері қабылдайды. Сұрағыңызға жазбаша түрде жауап берейік", - деді Қайрат Төребаев Сенаттың жалпы отырысынан соң.
Вице-министр еліміздегі нанның бағасы Өзбекстанмен салыстырғанда неге қымбат екенін түсіндіре алмады
"Мұнда электр энергиясын, салық және өзге де шығындарды есептеу керек. Өзбек наубайханалары мен қазақстандық наубайханаларының шығындарын қарау керек.
Сондай-ақ Қазақстан мен Өзбекстандағы нанның сапасын салыстыру керек. Сондықтан бұл - мәселе өте күрделі. Сіз бізге нақты статистиканы көрсетіңіз. Қандай нан қай жерде неше теңгеге сатылып жатқанын айтыңыз. Біз деректерді салыстырайық", - деді ол.
Айта кетейік, биыл қыркүйекте Сауда және интеграция министрлігі Сауда комитетінің төрағасы Айдар Әбілдабеков елімізде ұнның қымбаттап жатқанын растаған болатын.
"2-3 аптадан бері жаңбыр жауып жатыр, бидай кеппей жатыр. Ылғалдылық болғандықтан, ұнның баға өсе бастады... Бүгінде 13 өңірде ұнның 50 пайызға дейін қымбаттағаны рас", - деген еді төраға елордада өткен брифингте.
Қызықты жаңалықтар мен видеоларды көру үшін TikTok арнамызға жазылыңыз!
С. Сатыбалдина