Министр: Қыркүйектен бастап оқушылар қашықтан оқиды
![Министр: Қыркүйектен бастап оқушылар қашықтан оқиды](/userdata/news/news_62755/image_l.jpg)
Оқушылар мен студенттер қыркүйектен бастап қашықтықтан оқиды. Мұны ҚР Білім және ғылым министрі Асхат Аймағамбетов министрліктің Facebook-парақшасында өткен тікелей эфирде мәлімдеді.
- Күз айларында ОРВИ инфекциясы тарайтынын білеміз. Біз үшін оқушылар мен ата-аналардың, мұғалімдердің қауіпсіздігі басты орында. Сондықтан 1 қыркүйектен бастап еліміздегі мектептердің барлығы қашықтықтан оқыту форматымен оқитын болады, - деді Асхат Аймағамбетов.
Министрдің айтуынша, қашықтықтан оқытудың күрделі мәселе екені рас. Оның ішінде алыс, шалғай ауылдардағы ғаламтордың жоқтығы сынды мәселелер бар.
- Осы орайда екі нәрсені айта кеткім келеді. Біріншіден, шалғайда орналасқан, қауіп жоқ ауылдардағы шағын кешенді мектептің оқушылары штаттық режімде оқиды. Екіншіден, егер ата-аналардың өтініштері болса, онда бастауыш сыныптың оқушыларына арнайы уақытша сыныптарды ұйымдастырып беруге дайынбыз, - дейді министр.
Мұндай сыныптары санитарлық талаптарға сай болады. Мәселен, оқушының қызуы өлшеленеді, залалсыздандырылады, кварц шамдар орнатылады. Әлеуметтік қашықтықты сақтау үшін бір сыныпта 10-15-тен бала отырғызылмақ. Мектеп ауысымы мәселесі де қарастырылады.
- Ал колледж бен университет студенттері қашықтықтан оқиды, - деп кесіп айтты білім беру басшысы.
Қ. Слямбек