"Мені бір аға алып қашып кетті" деді". Алматы облысында зорланған 9 жастағы қыздың анасы тың дерек айтты
!["Мені бір аға алып қашып кетті" деді". Алматы облысында зорланған 9 жастағы қыздың анасы тың дерек айтты](/userdata/news/news_95121/image_l.png)
Алматы облысының Сауыншы ауылында зәбір көрген 9 жастағы қыздың анасы сұмдық жағдайдың қалай болғанын айтып берді, - деп хабарлайды Massaget.kz тілшісі "КТК" телеарнасына сілтеме жасап.
Әлдекім таңға жуық жеткіншекті алып қашып, даладағы жуынатын жерде жәбір көрсеткен. Қаскөй әлі құрықталмады. Кім екені де белгісіз. Бірақ осы оқиғадан кейін өре түрегелген Сауыншы халқы қаршадай қызды қорлаған ер адамның алыстан келмегеніне сенімді. Оған себеп те бар.
Сұмдық жағдай 12 қараша Сауыншы ауылында болған. Болжам бойынша, бетіне бетперде тағып қап-қара киінген ер адам осы үйдегі қызды ұйықтап жатқан жерінен көтеріп алып кетеді. Жуынатын жерге кіргізіп, ойына келгенін істеген.
Құшағынан құтылып шыққан қыз үйіне қарай қашып үлгерген. Сөйтіп шырт ұйқыда жатқан анасына алды қанжоса болып келген.
"Таңғы 05:00-де келіп оятып тұр. "Мені бір аға алып қашып кетті" деп. Ішіне зақым келген, жарылып кеткен деді. Негізінде мен түнде есіктерді өзім жабамын. Өзі шығып кетті деп ойлаймын. Өйткені мен білемін ғой, анық-қанығын. Өзім жаптым есікті түнде", - дейді қыздың анасы.
Зәбір көрген қыз - отбасындағы ортаншы бала. Анасы әжесімен бірге үш баланы өздері бағып-қағып отыр. Олар Сауыншы ауылына осыдан 4-5 жыл бұрын көшіп келген. Олардың айтуынша, қорлық көрсеткен ер адам сырттан келген. Алайда осы оқиғадан кейін өре түрегелген ауыл тұрғындары мүлде басқа пікірде.
"Күдіктенемін, өздерінің ішінен деп ойлаймын. Себебі мені өздерінің туысқандарының ішінен қатты бопсалады. Егер тілшілерді шақыратын болсаңыз, "үйтіп кетем, бүйтіп кетем" деген бопсалау көп болып жатыр. Өзінің үйіне келіп жүрген адам істейді. Басқа адам істемейді. Себебі оның үйінде сондай нәрселер болды деп көп естідім", - дейді көршісі Нұрсұлу Өсерова.
Ал тағы бір көршісінің айтуынша, үйіндегілер жиі ішеді.
"Үйіне ұсталары келеді. Ішеді анда-санда. Әжесі ішеді. Сол күні таңертең әжесі кірді "осындай жағдай болды бізде" деп. Сосын мен де айттым "біздің дәлізде біреу темекі шегіпті" деп. Дәлізімнің есігі ілінбейді. Кіріп, темекісін шегіп кеткен", - дейді көршісі Нарғыз Момбекова.
Шу шығарған тұрғындар ерсі қылық танытқан ер адамның әлі күнге дейін неліктен ұсталмай жатқанын түсінбей отыр. Жұрт полицейлерге қапалы.
"Сол күні полиция екі күн ғана келді. Одан кейін келген де жоқ, сұраған да жоқ, іздеген де жоқ. Қазір қыз, ұл деп қарап жатқан жоқ. Соның бәріне заң шығарсын. Әлде міндетті түрде министрдің, басшының қыздары зорлануы керек пе? Бұл - деген сұмдық! Балаларымызды көшеге, дүкенге жібере алмай қалдық қой", - деді Айжұлдыз Күзібаева.
Нақты не болғанын білу үшін геномдық сараптама тағайындалған. Қорытындысы әлі шықпады. Полицейлердің айтуынша, күдікті де әзірге жоқ.
"12 қарашада Қарасай ауданы ПБ-ға Сауыншы ауылының 32 жастағы тұрғыны сол күні таңғы сағат бесте жас қызына қатысты сексуалдық сипаттағы зорлық-зомбылық жасаған белгісіз адамға қатысты шара қабылдау туралы арызданды. Бұл дерек ҚР Қылмыстық кодексінің 121-бабының 4-бөлігі бойынша аудандық полицияда тіркелді. Қазір қылмыстың барлық мән-жайы тергеліп жатыр, оның жан-жақтылығын, толық және объектив болуын қамтамасыз ету мақсатында сараптама, тексерулер тағайындаумен тергеу жүріп жатыр", - деді Алматы облысы ПД ресми өкілі Ернар Сайділдин.
Бәзбіреудің анайы әрекетінен кейін 4-сынып оқушысы бір апта ауруханада жатқан. Қазір үйінде. Жағдайы оңалған. Енді анасы да, ауыл тұрғындары да полицейлерден қаскөйдің тездетіп құрықталуын талап етіп отыр. Балаларына алаңдаған жұрт күдікті ұсталғанға дейін тәртіп сақшыларының күн-түнге қарамай ауылды күзетуін сұрап отыр.
Өзекті жаңалықтарды өз уақытында оқу үшін Facebook парақшамызға жазылыңыз!
С. Бөлек