Мемлекет басшысы жемқорлықпен қалай күресу керегін айтты

Үкіметтің кеңейтілген отырысында президент Қасым-Жомарт Тоқаев жемқорлықпен жаппай күресуге тапсырма берді, - деп хабарлайды Massaget.kz тілшісі.

"Тағы бір өзекті мәселе - сыбайлас жемқорлық. Бұл - құрылыс саласын ғана емес, жалпы экономиканы дамытуға тосқауыл болатын фактор. Сыбайлас жемқорлыққа қарсы жаппай күресу қажет. Мен бұл туралы үнемі айтып жүрмін. Осы бағытта біраз жұмыс жасалды, нәтиже де бар. Бірақ, солай екен деп, босаңсуға болмайды. Жұмысты жалғастыру қажет. Әсіресе, цифрландыруды белсенді түрде қолдану керек", - деді президент.

Оның айтуынша, қазір құрылыс саласында бірнеше ақпараттық жүйе бар.

"Осындай тәсілдер арқылы бөлінген қаражаттың мақсатқа сай жұмсалуын қамтамасыз ету қажет, яғни барынша ашық және қатаң бақылау болуға тиіс. Бұл – өте маңызды мәселе. Себебі, қаржының ұрлануы, ең алдымен, құрылыстың сапасына әсер етеді және бюджетке қосымша салмақ салады. Ақшаға цифрлық теңге арқылы ен салу және оны қадағалау, басқаша айтқанда, "ақшаны бояу" бюджет қаражатының жұмсалуын бақылайтын өте маңызды тетік болуы мүмкін", - деді Қасым-Жомарт Тоқаев.

Мемлекет басшысы бүгінде цифрлық валютаны қолдануға қатысты пилоттық жобалар тиімді жүзеге асырылып жатқанын еске салды.

"Сыбайлас жемқорлыққа қарсы іс-қимыл агенттігіне Үкіметпен және Ұлттық банкпен бірлесіп, осындай жобалардың ауқымын кеңейтуді, оның ішінде құрылыс саласына барынша енгізуді тапсырамын", - деді ол.

Аяз Есен 

Аптаның басты оқиғалары мен пайдалы видеоларды көру үшін YouTube арнамызға жазылыңыз