Мектептерде оқу жылы нақты қашан аяқталатыны белгілі болды
![Мектептерде оқу жылы нақты қашан аяқталатыны белгілі болды](/userdata/news/news_81456/image_l.jpg)
Оқу-ағарту бірінші вице-министрі Шолпан Каринова оқу жылының күнтізбесіне қатысты жаңа өзгерістерді бөлісті, - деп хабарлайды Massaget.kz тілшісі.
2022-2023 оқу жылын аяқтау және орта білім беру ұйымдарында білім алушыларды қорытынды аттестаттаудан өткізу мерзімдерін бекіту туралы оқу-ағарту министрінің бұйрығы қабылданды.
"Бұйрық бойынша:
- Меншік нысанына және ведомстволық бағыныстылығына қарамастан, орта білім беру ұйымдарындағы оқу сабақтары 31 мамырда аяқталады.
- 9 (10) сыныптарда білім алушылардың қорытынды бітіру емтихандары 2-13 маусым аралығында өткізіледі.
- 11 (12) сыныптарда білім алушылардың мемлекеттік бітіру емтихандары - 2023 жылғы 5-19 маусым аралығында өткізіледі", - делінген жазбасында.
Сондай-ақ, вице-министр қорытынды аттестаттауды өткізудің мерзімдерін атады.
"9 (10)-сынып оқушылары үшін:
1) оқыту тілі бойынша эссе нысанында жазбаша емтихан, гуманитарлық цикл пәндерін тереңдетіп оқытатын мектептер үшін - жазбаша жұмыс (мақала, әңгіме, эссе) - 2023 жылғы 2 маусым;
2) математика (алгебра) бойынша жазбаша емтихан (бақылау жұмысы) - 2023 жылғы 6 маусым;
3) өзге тілдерде оқытатын сыныптарда қазақ тілі мен әдебиеті бойынша жазбаша емтихан (мәтінмен жұмыс, мәтін бойынша тапсырмаларды орындау) және қазақ тілінде оқытатын сыныптарда орыс тілі мен әдебиеті бойынша жазбаша емтихан (мәтінмен жұмыс, мәтін бойынша тапсырмаларды орындау) - 2023 жылғы 9 маусым;
4) таңдау пәні бойынша жазбаша емтихан (физика, химия, биология, география, геометрия, Қазақстан тарихы, дүниежүзі тарихы, әдебиет (оқыту тілі бойынша), шет тілі (ағылшын/француз/неміс), информатика) - 2023 жылғы 13 маусым", - деді ол.
Ал бітіруші түлектер үшін қорытынды емтихан 5 пән бойынша мына күндер аралығында өтеді.
"11 (12) сынып оқушылары үшін:
1) оқыту тілі бойынша жазбаша емтихан - 2023 жылғы 5 маусым;
2) алгебра және анализ бастамалары бойынша жазбаша емтихан - 2023 жылғы 8 маусым;
3) Қазақстан тарихы бойынша ауызша емтихан - 2023 жылғы 12 маусым;
4) өзге тілдерде оқытатын сыныптарда қазақ тілі мен әдебиетінен және қазақ тілінде оқытатын сыныптарда орыс тілі мен әдебиетінен жазбаша емтихан - 2023 жылғы 15 маусым;
5) таңдау пәні бойынша жазбаша емтихан (физика, химия, биология, география, геометрия, дүниежүзілік тарих, құқық негіздері, әдебиет (оқыту тілі бойынша), шет тілі (ағылшын/француз/неміс), информатика) - 2023 жылғы 19 маусым", - деді ол.
Вице-министрдің айтуынша, облыстардың, Астана, Алматы және Шымкенттің білім басқармалары оқу жылын ұйымдасқан түрде аяқтау бойынша тиіс шараларды ұйымдастырады.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
С. Бөлек