Медина, Алияна, Сурая. Қазақ жұлдыздары балаларына қойған ерекше есімдер
![Медина, Алияна, Сурая. Қазақ жұлдыздары балаларына қойған ерекше есімдер](/userdata/news/news_71208/image_l.jpg)
Халқымыз жаңа туған нәрестеге ат қою дәстүріне ерте заманнан үлкен жауапкершілікпен қараған. Кез келген ата-ана баласына мағынасы дұрыс, көркем ат қоюға тырысады. Баланың есімі болашағына әсер етеді дегенге сенетіндер де жоқ емес. Massaget.kz тілшісі шоу-бизнес өкілдері балаларына қойған ерекше есімдер мен оның мағынасына шолу жасады.
Шахназ, Табиғат
Бұл әнші Нұрболат Абдуллиннің қыздарына қойған есімі. Отбасын көп жариялай бермейтін әнші алғаш рет жанұясын Instagram желісіндегі парақшасында 2018 жылы қазанда жарын туған күнімен құттықтап, жазба жариялап көрсеткен.
Нұрболат Абдуллин отбасымен © instagram.com/nurbullin
Ашық дерек көздеріне сүйенсек, Шахназ есімі әзербайжан тілінен аударғанда "кербездік патшасы" деген мағынаны білдіреді екен.
Амели
"All Давай" тобының солисі Шоқан Маратұлы бүгінде жары Анелмен Алимхан есімді ұл мен Амели есімді қыз тәрбиелеп отыр. Амели - сирек есімдердің бірі.
© instagram.com/shokan_maratuly
Жалпы, Амели есімінің шығуы туралы бірнеше нұсқа бар. Негізгі нұсқа бойынша, бұл есім француз тілінен аударғанда "гүл" мағынасын білдіреді. Сонымен қатар, бұл есім Германиядан шыққан деген нұсқа бар. Яғни, "еңбекқор" деген мағына береді.
Медина
2019 жылы 29 қаңтарда әнші Талғат Жорабаевтың екі ұлдан кейін дүниеге қызы келді. Әнші қызының есімін Медина деп қойған. Ұлдарының есімі - Әбумансұр және Әбубәкір.
Әнші Талғат Жорабаев отбасымен © instagram.com/ayauka_askarkyzy
Медина есімі "қала" деген мағынадан шыққан. Медина - мұсылмандардың қасиетті қаласы.
Дара
2019 жылы әнші Жазира Байырбекова 22 жылдан кейін екінші балалы болды. Жанболат пен Жазира жалғыз қызына Дара деген есім берген.
© instagram.com/ikazeke
Қарындасының есімін жұлдызды жұптың ұлдары Қазыбек қойған екен.
"Дара қарындасымды қандай жоспар күтіп тұрғаны бізге беймәлім. Бірақ, Дара есімін қойған себебім - 22 жыл үзіндіден кейін табылған, ерекше күнтізбеде туылған, біздей мықты отбасын таңдаған, ең бастысы қазақ елінде туған, ерекше Дара атқа ие болды", - деп түсіндірген әншінің ұлы.
Алияна, Ясина
Бұл ерекше есімдер боксшы Жанқош Тұраровтың қыздарына тиесілі. Жалпы, Алияна есімінің шығуы туралы түрлі дерек бар. Араб теориясына сәйкес, Алияна есімі "патшайым", "әмірші әйел" және "мәртебелі" деген мағына білдіреді.
Жанқош Тұраров отбасымен және бауырларымен © instagram.com/klarita_os
Ал Ясина есімі араб тіліндегі Құранның 36 сүресі, яғни, "Ясин" сүресінің атауынан шыққан. Есім "мейірімді", "тура жол жүретін, таза жанды" деген мағына білдіреді екен.
Карима, Калима
Көпбалалы әке Кенжебек Жанәбіловтің Карима және Калима есімді егіз қыздары бар. Карима - жомарт, гауһардай қымбат деген мағына берсе, Калима - мейірбан, бейбіт деген мағына береді екен.
Кенжебек Жанәбілов отбасымен © instagram.com/kenzhebekmuzart
Мәриям, Райана, Сәфия
Бұл әнші Сәкен Майғазиевтің қыздарына қойған есімі. Әншінің өзі он бір ағайынды, Сәкен отбасында тоғызыншы екен. Үлкен қызы Райана 2013 жылы, Мәриям 2016 жылы, кенжесі Сәфия 2018 жылы дүниеге келген.
Сәкен Майғазиев қыздарымен © instagram.com/saken_maigaziyev
Кәусар
Әнші Мейрамбек Бесбаевтың үлкен қызының есімі - Кәусар. Кәусар - таза, тәтті, мөлдір ұғымдарын білдіретін сөз. Діни мағынасы - жаннаттағы қасиетті су.
Мейрамбек Бесбаев отбасымен © instagram.com/m_besbaev
Таулан
Актер Нұржан Төлендиевтің Таулан есімді ұлы 2016 жылы дүниеге келген. Дереккөздерге сүйенсек, Таулан есімі жалпы "таулық" деген мағына береді. Яғни, тау және ұлан деген сөздерден шыққан.
© instagram.com/nurjan.tolendiev.official
Сурая
Сурая - әнші Динара Сұлтанның тұңғышы. Жалпы, бұл есім сирек кездесетін есімдердің бірі. Бұл атау араб тілінен шыққан. "Баю", "бай болу" деген мағына білдіреді екен.
© instagram.com/dinara_sultan1
Тауасар
Бұл актер Берік Айтжановтың тұңғыш ұлының есімі. "Тауасар" - зат есім мен етістіктің қосылуынан жасалған. Араб және қазақ тілдерінде бірдей мағынаны білдіреді.
Актердің ұлы © instagram.com/berik_aitzhanov
Софи
Әнші әрі актриса Жания Джуринская биыл дүниеге тұңғышын алып келген. Оған Софи деп ерекше есім қойыпты.
Фото: instagram.com/djurinskaya
Актриса кейін Instagram-парақшасында бұл есімді неге таңдағанын түсіндіріпті.
"Бұл есімге жасөспірім кезімнен ғашықпын және қызымды осылай атауды армандадым. Әрі бұл менің әжемнің есімі. Қыз күтіп жүргенімізді білгенде Данияр менің қалауымдағы есімді қолдады. Тек есімнің соңындағы "я" әрпі үшін екеуміз біраз таласқанымыз бар. Мен София, ал ол Софи болғанын қалады. Бірақ босану кезінде менің қалай қиналғанымды көріп, күйеуім мені аяп кетті де, әрең дегенде: "Жарайды, құжатта София болсын, өмірде Софи деп атаймыз", - деп жазды өнер иесі Instagram парақшасында.
Теодор
Әнші Мақпал Исабекова ұлына ерекше есім қойған - Теодор.
Фото: instagram.com/makosyai
"Күйеуім екеуміз отбасылы болғаннан бастап балаларымызға қандай есім қоямыз деп ойланатынбыз. Асқар, Азамат, Олжас секілді есімдер қойғым келмеді. Халықаралық, көп кездесе бермейтін сирек есімдерді іздедік. Осы кезде күйеуімнің фантазиясы мені тағы таңғалдырды, мойындаймын. Ол біздің өмірге келмеген жеті баламызға да есім дайындап қойған екен. Арамызда дау болмас үшін ұл болса есімін күйеуім, қыз болса мен қоямын деп бірден келістік. Себебі, қызым болса қоямын деп армандап жүрген есім бар еді.
Жүктілігімнің үшінші айында ұлды болатынымызды естіп, есім қою бақытынан айырылып қалдым. Бірақ күйеуімнің бірінші баламызға қойған есімінің дыбысына, мағынасына, қысқартылған нұсқасына, сиректігіне ғашық болдым.
Теодор! Құдайдың сыйы! Тео! Тедди!
Ол бізге Құдайдың берген сыйы! Біздің құтты баламыз! Әлхамдулиллаһ", - деп жазды әнші.
Теодор есімі латын тілінен шыққан. Қазақ тіліне аударғандағы мағынасы "Құдайдың сыйы", "Құдайдың хабаршысы". Бұл Федор есімінің шетелдік аналогы.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Е. Төлеш