“Мәрмәр“ жаяу маршруты: Үлкен Алматы көліне жету жеңілдейді

Үлкен Алматы көліне апаратын "Мәрмәр" жаяу маршрутын абаттандыру жұмыстары аяқталып келеді. Жоба Іле Алатауы мемлекеттік ұлттық табиғи паркі мен Алматы қаласы әкімдігінің бірлесуімен жүзеге асырылып жатыр, – деп хабарлайды Massaget.kz.

Жобаның негізгі мақсаты – ұлттық парктің табиғи ландшафтын сақтай отырып, келушілердің қауіпсіз әрі жайлы серуендеуіне жағдай жасау. Абаттандыру барысында табиғи ортаға барынша ұқыпты қарауға және таулы аумақтың ерекшелігін сақтауға басымдық беріледі.

Маршрут бойында демалыс орындары жасалады

Соқпақ Үлкен Алматы көліне жаяу баратын туристер үшін қолайлы және қауіпсіз етіп жабдықталады.

Бұл нысандар әсіресе таулы жермен ұзақ жүруге дағдыланбаған адамдардың аялдап, демалуына мүмкіндік береді. Бағыттаушы белгілер туристердің белгіленген соқпақтан ауытқымай, қажетті бағытпен қозғалуына көмектеседі.

Жаяу маршрутты ретке келтіру келушілердің қауіпсіздігін арттырумен қатар, адамдардың бейберекет жолдармен жүруін азайтып, өсімдіктер дүниесі мен табиғи топырақ жамылғысын қорғауға да ықпал етеді.

Көл маңында шолу алаңы жабдықталады

Жоба аясында Үлкен Алматы көлінің маңында табиғат көрінісін тамашалауға арналған арнайы шолу алаңын жабдықтау жоспарланған.

Алаңнан келушілер көл мен оны қоршаған тау шыңдарын қауіпсіз жерден тамашалай алады. Бұл туристер легін бір аумақта реттеп, көл жағасына рұқсатсыз жақындауды шектеуге де көмектеседі.

Жаяу маршрутта ірі құрылыс нысандарын салудан гөрі табиғи ортаға үйлесетін шағын инфрақұрылым жасауға мән беріліп отыр.

Жоба аяқталғаннан кейін "Мәрмәр" бағыты табиғатты тамашалауға, жаяу серуендеуге және тау туризмімен айналысуға арналған реттелген маршруттардың біріне айналмақ.

Үлкен Алматы көлі туралы не білеміз?

Үлкен Алматы көлі – Іле Алатауының Үлкен Алматы шатқалында орналасқан биік таулы көл. Ол Алматы қаласынан шамамен 15 шақырым қашықта жатыр.

Үлкен Алматы көлі ежелгі мұздықтардың қозғалысы нәтижесінде пайда болған. Оның суы жыл мезгіліне, ауа райына және жарықтың түсуіне қарай ақшыл жасылдан қанық көгілдір түске дейін өзгеріп тұрады.

Көлді биік тау жоталары мен қарлы шыңдар қоршап жатыр. Ерекше табиғи көрінісіне байланысты бұл жер туристер, фотографтар және тауда жаяу серуендеуді ұнататындар арасында кеңінен танымал. Сонымен қатар Үлкен Алматы көлі – қаланы сумен қамтамасыз ететін маңызды нысандардың бірі.