Түркістан облысында 5 млн теңге бопсалады деген күдікпен ер адам ұсталды, - деп хабарлайды Massaget.kz тілшісі.
Мән-жайы
Түркістан облысы Полиция департаменті ұйымдасқан қылмысқа қарсы күрес басқармасының қызметкерлері жедел іздестіру іс-шаралары барысында ақша бопсалады деген күдікпен Сарыағаш ауданының 38 жастағы тұрғынын ұстаған.
Алдын ала мәлімет бойынша ер адам Шымкент тұрғынын ар-намысына нұқсан келтіретін мәліметті таратамын деп қорқытып, одан 5 миллион теңге талап еткен. Тінту барысында күдіктіден телефон мен 5 миллион теңге көлеміндегі ақша тәркіленді.
Күдікті қамауда
Ведомство мәліметінше, ер адам бұған дейін ұрлық пен есірткі сақтау дерегі бойынша қылмыстық жауапкершілікке тартылған.
"Қазір күдікті қамауда. Бұл дерекке қатысты ҚР Қылмыстық кодексінің 194-бабы (Бопсалау) бойынша соталды тергеп-тексеру жүргізіліп жатыр", - деп жазылған хабарламада.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова