Маңғыстауда мұнайшылар мінген автобус жол апатына ұшырады

Маңғыстау облысында Қаражанбас бағытындағы тасжолда ішінде жолаушылары бар шағын автобус жылқымен соқтығысты. Алдын ала мәлімет бойынша апатта бір адам зардап шегіп, жылқы өлген, - деп хабарлайды Massaget.kz тілшісі.

Полиция мәліметінше, зардап шеккен адам ауруханаға жеткізілген.

"Автокөлік жүргізушісі жол қозғалысы ережелерін бұзғаны үшін жауапкершілікке тартылды. Сараптама тағайындалды. Оның нәтижелеріне сәйкес қылмыстық жауапкершілікке тарту мәселесі қаралады", - деді Маңғыстау облысы полиция департаментінің баспасөз қызметі.

Сондай-ақ полиция мәліметінше, жылқының иесі де жауапкершілікке тартылады. Қазір оны анықтау жұмыстары жүргізіліп жатыр.

"Иесі анықталғаннан кейін, ол ауыл шаруашылығы жануарларын бағу ережелерін бұзғаны үшін әкімшілік жауапкершілікке тартылады", - деп қосты полиция.

Қызықты жаңалықтар мен видеоларды көру үшін TikTok арнамызға жазылыңыз!