"Манас" эпосы 60 жылдан кейін қазақ тілінде қайта шықты
!["Манас" эпосы 60 жылдан кейін қазақ тілінде қайта шықты](/userdata/news/news_63351/image_l.jpg)
Бүгін Нұр-Сұлтандағы Достық үйінде Қазақстан халқы Ассамблеясы мен Халықаралық Түркі академиясы ұйымдастырған "Бекем бауырластық байланыстар: Манастан Абайға дейін" атты жиын өтіп, қазақ тіліне аударылған "Манас" жыры мен Абай шығармаларының қырғыз тіліндегі академиялық басылымы таныстырылды.
Шараға Халықаралық Түркі академиясының президенті Дархан Қыдырәлі, Қырғыз Республикасының Қазақстандағы Елшісі Жиенбек Құлыбаев, Қазақстан халқы Ассамблеясының Төрағасының орынбасары, ҚР Президенті Әкімшілігінің ҚХА хатшылығының меңгерушісі Жансейіт Түймебаев және ғалымдар, мемлекет, қоғам қайраткерлері, зиялы қауым мен этномәдени бірлестік өкілдері қатысты.
Бұл шараға бірнеше мерейтой себеп болып отыр: биыл Абайжың 175 жылдығы және Қазақстан халқы Ассамблеясының 25 жылдығы.
"Бүгін бауырластық байланысымызды бекемдей түсетін рухани қазыналармен толығып жатырмыз. 1961 жылғы Мұхтар Әуезовтің басшылығымен жарық көрген "Манас" жыры 60 жылдан кейін қазақ оқырмандарының қайта ұсынылып отыр.
Абайдың биылғы 175 жылдығы Қазақстанда ғана емес, бауырлас түркі халықтарында да атап өтіліп жатыр. Соның жақсы бір үлгісі – Абай тек қана қазақтың ақыны емес, қырғызға да ортақ тұлға ретінде академиялық таңдамалы жинағы бірінші рет жарық көріп отыр. Халықаралық Түркі академиясы аталған екі еңбекті назарларыңызға ұсыну мәртебесіне ие болып отыр", - дейді Түркі академиясының президенті Дархан Қыдырәлі.
Эпосты қырғыз тіліне аударған – жыршы, манасшы Баянғали Әлімжанов. Оған түркі дүниесінің әдеби мұраларын жинақтап, насихаттауға атсалысып, зерттеуге қосқан үлесі үшін Халықаралық Түркі академиясының Алғыс хаты табыс етілді.
Атап өтейік, Абайдың 175 жылдығы аясында ақынның академиялық жинақтары әлемнің біршама тілдеріне аударылды. Олардың әрбірі Қазақстанның шетелдердегі елшіліктерінде таныстырылды. Жалпы, Абайдың 175 жылдығын атап өту аясында үлкенді-кішілі 500-ге жуық халықаралық және ұлттық іс-шаралар жоспарланған.
Сонымен бірге, жақын арада Абай Құнанбайұлы шығармаларының академиялық толық жинағы жарыққа шығатын болады. Мұхтар Әуезов атындағы Әдебиет және өнер институтының директоры Кенжехан Матыжановтың айтуынша, бұл жинақ – ширек ғасырды артқа тастап, қайта жарық көріп отырған ең толық, академиялық, ғылыми жинақ.
Massaget