Белгілі қазақстандық әнші Мақпал Жүнісова әлеуметтік желідегі парақшасында домбырасын бортқа өткізбей қойған FlyArystan әуекомпаниясына шағым білдірді, - деп хабарлайды Massaget.kz тілшісі.
FlyArystan әуекомпаниясы Мақпал Жүнісованы домбырасымен бірге ұшаққа кіргізу үшін қосымша 59 мың теңге төлем жасауын талап еткен.
"Домбыра деп көрсетпесе де, оны 59 мың теңгеге әрең өткіздік. Мен үшінші рет осындай жағдайға тап болып отырмын", - деді әнші.
FlyArystan әуекомпаниясы Мақпал Жүнісованың бұл шағымына бірден жауап беріп, музыкалық аспаптарды тасымалдау бойынша арнайы ереже бар екенін жазды. Ережеге сай, аспапты бортқа алып өтуге тек қол жүгі ретінде рұқсат беріледі. Ол үшін аспаптың салмағы 5 келіден аспауы қажет, ал көлемі 56x23x36 см-ден үлкен болмауы шарт. Егер тасымалдайтын аспап бұл талаптарға сәйкес келмесе, қосымша ақы төлеуге мәжбүр.
"Біз барлық өнер иелерінің еңбегін жоғары бағалаймыз және халқымыз үшін қасиетті домбыраның құндылығын түсінеміз. Дегенмен барлық жолаушыларға тең қарым-қатынас көрсету және ортақ ережелерді сақтау - қауіпсіздікті қамтамасыз етудің кепілі", - деп жазды FlyArystan хабарламасында.
Еске салайық, бұған дейін танымал тележүргізуші Ләйлә Сұлтанқызы да отандық әуекомпанияның үстінен арыз жазған болатын.
Аптаның басты оқиғалары мен пайдалы видеоларды көру үшін YouTube арнамызға жазылыңыз