"Маған айтпай, ажырасуға арыз берді". Гүлмира Сатыбалды экс-жұбайы туралы айтты

Сот Қайрат Сатыбалдыұлының бұрынғы әйелі - Гүлмира Сатыбалдыдан жауап алуды бастады, - деп хабарлайды Massaget.kz тілшісі.

Астанада кәсіпкер Қайрат Сатыбалдыұлының бұрынғы әйелі Гүлмира Сатыбалдыға қатысты сот процесі жалғасып жатыр. Оған бизнесті рейдерлік жолмен тартып алды және адам ұрлады деген айыптар тағылған.

Бүгін сотта күдіктілерден жауап алу басталды. Гүлмира Сатыбалдыға алдымен адвокаттары сұрақ қойды.

Оған бұрынғы күйеуі қолдау білдіре ме деген сұрақ қойылды.

"Қайрат Сатыбалды екеуміздің ажырасқанымызға 20 жыл болды. 2002 жылы желтоқсанда бөлек кеттік. Мен ол кезде мемлекеттік органдарда жұмыс істедім, декларация тапсыруым керек еді. Қайрат маған айтпай, ажырасуға арыз берді. Содан балалармен кеттім. Міне, ашық әңгіме. Оған ешқандай шағымым жоқ. Қайрат Сатыбалды Тұңғыш Президенттің жиені, бәрі оның алдында биледі. Мен екінші орында болдым. Оның үстіне, мен көпбалалы отбасынанмын. Ата-анамның 10 баласы болды. Мен - жетінші баламын. Сондықтан Қайрат сияқты жігіттің маған үйленгеніне қуандым, одан үш бала дүниеге әкелдім", - деді Гүлмира Сатыбалды.

Сотталушы Қайрат Сатыбалдыұлымен ажырасқаннан кейін мемлекеттік органдарда жұмыс істегенін айтты.

"2002 жылы мен ажырастым. ОСК-ға маман болып, кейін Конституциялық кеңеске жұмысқа орналастым, содан кейін Мемлекеттік басқару академиясын бітіріп, Білім министрлігіне ауыстым. Содан кейін Америкаға кеттім. Мен Қайрат Сатыбалдымен араласпадым деп айта алмаймын. Онымен араластым және талабым болды. Ол әке ретінде балаларын лайық түрде қамтамасыз етті, оқуы мен пәтер ақысын төледі, үш баласы да Америкада мектеп бітірді, ал Қазақстанда жоғары білім алды", - деп толықтырды әйел.

Сотта Гүлмира Сатыбалдының зәулім үйі көрсетілді

Кейінгі сот отырысында Гүлмира Сатыбалды ісі бойынша жәбірленушілер сотта 12 миллиард теңгеге жуық ақшаны қайтаруды талап етті. Іс бойынша жәбірленуші ретінде белгілі кәсіпкер Тұрсен Алагөзов пен адам ұрлау ісі бойынша жәбірленуші Айгүл Мекешева шықты.

Астанада Гүлмира Сатыбалдыға қатысты сот өтіп жатыр: ол үйқамаққа ауыстыруды сұрады

Жәбірленуші - Баян Алагөзованың күйеуі. Гүлмира Сатыбалдының ісіне қатысты жаңа деректер шықты

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!