Қытайлықтар көп: Қазақстанда қанша шетелдік жұмыс істейді?

Қазақстанда 13 мыңнан аса шетел азаматы жұмыс істейді, - деп хабарлайды Massaget.kz тілшісі.

Еңбек және халықты әлеуметтік қорғау министрлігі мәліметінше, 2025 жылғы 1 ақпандағы жағдай бойынша жергілікті атқарушы органдардың рұқсатымен Қазақстан аумағында 13 072 шетел азаматы еңбек етеді.

Шетелден жұмыс күшін тартуға рұқсаттар арасында мынадай санаттар бар:

• басшылар мен олардың орынбасарлары үшін 568 рұқсат (бірінші санат),
• құрылымдық бөлімшелердің басшылары үшін 2 528 рұқсат (екінші санат).
• Тартылған шетелдік жұмыс күшінің негізгі бөлігі үшінші (мамандар) және төртінші (білікті жұмысшылар) санаттарға жатады: олар 4 787 және 987 адам.
• Сондай-ақ, маусымдық жұмыстарға 672 адам, ал корпоративтік ауыстыру аясында 3 530  адам тартылған.

Министрлік мәліметіне сүйенсек, қазір Қазақстанда шетелден жұмыс күшін пайдаланатын 1 710 жұмыс беруші бар. Оларда 383,1 мыңнан аса Қазақстан азаматы жұмыс істейді, бұл - қызметкерлердің жалпы санының 96,6 пайызы.

Шетелдіктер қай салаларда жұмыс істейді?

Экономикалық қызмет түрлері бойынша ең көп жұмыс істейтіндер құрылыс саласында - 5 343 адам, тау-кен өнеркәсібі және карьерлерді қазу - 1 360 адам, өңдеу өнеркәсібі - 1 338 адам, әкімшілік және көмекші қызметтер - 1 089, ауыл, орман және балық шаруашылығы - 688 адам.

Еңбек мигранттары қай елдерден келеді?

Еңбек мигранттары келетін негізгі елдер:

• Қытай - 4 778 адам,
• Түркия - 1 158 адам,
• Үндістан - 1 121 адам,
• Өзбекстан - 623 адам.

Instagram парақшамызға жазылып, ең қызықты ақпараттарды бірінші болып оқыңыз!