Қыста көліктегі дизель қатып қалмауы үшін не істеу керек?

Қыс мезгілінде қар мен аяздан бөлек, жүргізушілер үшін белгілі бір қиындықтар туындайды. Әсіресе дизельмен жүретін көлік иелері үшін. Дизельді отынның қатып қалуы - ең жиі кездесетін мәселелердің бірі, ол көлікті пайдалануды қиындатып, тіпті оның толық тоқтап қалуына әкелуі мүмкін, - деп хабарлайды Massaget.kz тілшісі.

Бұл мәселе дизель отынының химиялық құрамынан туындайды, өйткені төмен температурада ол сұйықтығын жоғалтып, желім тәрізді күйге өтеді. Мақалада дизель отынын қандай температурада пайдалануға болатынын, ол қатып қалса не істеу керек және болашақта осындай жағдайларды болдырмау үшін қандай алдын алу шаралары бар екенін қарастырамыз.

Жазғы дизель қатып қалса

Егер көлік багында жазғы мезгілге арналған дизель болса, ол -5°С дейін пайдалануға жарамды, ал -10°С температурада қатып қалады. -5°С кезінде парафиндеу процесі басталады, бұл отын жүйесі мен бакқа зақым келтіруі мүмкін.

Бұл жағдайда көлікті сервис орталығына апарып тексерту қажет болады, сүзгіні жиі ауыстыру керек, өйткені ол төмен температураның әсеріне ұшырайды. Барлық отынды төгіп тастау міндетті емес, тек антигель қосып, қысқы дизель отынын құю жеткілікті.

Қысқы дизель қатып қалса

Қысқы дизель отынына қосылатын арнайы қоспалар оны қатып қалудан сақтайды, бұл отынның кеңеюін болдырмайды және көлік жүйелеріне, соның ішінде отын багі мен сүзгісіне зиян келтірмейді. Бірақ егер ауа температурасы қысқы дизельдің қатып қалу температурасынан төмен түссе, мәселе туындауы мүмкін.

Мысалы, -15°С температурада қататын дизель қолданылып, ауа температурасы -30°С жетсе, бұл отын жүйесіне зақым келтіруі мүмкін. Мұндай жағдайда қандай шаралар қолдану керек екенін білу маңызды.

Егер дизель қатып қалса, бірнеше тәсіл бар. Физикалық әдістер: фен немесе бу генераторын қолдану арқылы отын сүзгісін жылыту және парафиндерді еріту, көлікті жылы бокста қыздыру. Химиялық әдістер: дизель отынын керосинмен, тежегіш сұйықтығымен немесе антигельмен сұйылту. Бұл процесс уақытты қажет етеді, сондықтан антигельді алдын ала қосып қойған дұрыс.

Қозғалтқыш істеп тұрса

Егер көлік қозғалтқышы іске қосылып, біраз уақыттан кейін өшіп қалса, бұл дизельдің қатып қалғанын білдіреді. Қандай шараларды қолдану керектігін қарастырайық:

• Бактағы отын мөлшері жартысынан аз болса: қысқы дизель мен антигельді сатып алыңыз (кемінде 20 литр). Антигельді +20°С температурада алдын ала қыздырылған дизельмен араластырып, көлікке құйыңыз. Біраз уақыттан кейін қозғалтқышты қайта қосып көріңіз.
• Бак толық болмаса, дизельді тұтынудың қайта қалпына келуі үшін арнайы отын еріткішін сатып алыңыз. Оны бакқа құйып, бірнеше минут күтіңіз.

Қозғалтқыш іске қосылмаса

Егер көлік қозғалтқышы іске қосылмаса, дизель отынының сүзгісі немесе сепараторында арнайы кран болса, оны ашып, отын насосын бірнеше рет басу арқылы тексеріңіз. Егер отын өтсе, мәселе шлангта немесе жылытқыштардың істен шығуында болуы мүмкін.

Қандай шаралар қолдануға болады:

• Автокөлікті жылы жерде, мысалы, жылы бокста сақтау немесе сауда орталығының тұрақтарына апару.
• Жылытқышпен көліктің астын қыздыру.
• Температура көтерілуін күту.

Қызықты жаңалықтар мен видеоларды көру үшін TikTok арнамызға жазылыңыз!

Д. Шәріпхан