Қыркүйектен бастап студенттер қанша теңге шәкіртақы алады?
![Қыркүйектен бастап студенттер қанша теңге шәкіртақы алады?](/userdata/news/news_89034/image_l.jpg)
1 қыркүйектен бастап ай сайынғы мемлекеттік шәкіртақы мөлшері өседі, - деп хабарлайды Massaget.kz тілшісі.
Бакалавриат студенттерінің шәкіртақысы 20 пайызға, магистранттар мен докторанттардың шәкіртақысы 15 пайызға, ТжКБ студенттерінің шәкіртақысы 50 пайызға өседі. ҚР премьер-министрі Әлихан Смайылов Үкіметтің тиісті қаулысына қол қойды.
- Докторанттарға (оның ішінде "Денсаулық сақтау" бағыты бойынша) 217 500 теңге;
- Даярлаудың "Денсаулық сақтау" бағыты бойынша резидент-дәрігерлерге және магистранттарға 111 579 теңге;
- Магистранттарға 97 024 теңге;
- Интерндерге 75 890 теңге;
- Жоғары білімнің білім беру бағдарламаларын іске асыратын білім беру ұйымдарында даярлаудың педагогикалық және "Денсаулық сақтау" бағыттары бойынша білім алатын студенттерге 67 200 теңге;
- Даярлаудың педагогикалық бағыттары және "Денсаулық сақтау" бағыты бойынша білім алатын студенттерді қоспағанда, жоғары білімнің білім беру бағдарламаларын іске асыратын білім беру ұйымдарында білім алатын студенттерге 41 898 теңге;
- Техникалық және кәсіптік білімнің білім беру бағдарламаларын іске асыратын білім беру ұйымдарында жұмысшы біліктіліктері бойынша оқитын студенттерге 32 681 теңге;
- Техникалық және кәсіптік (орта буын мамандарын даярлауды көздейтін), орта білімнен кейінгі білімнің білім беру бағдарламаларын іске асыратын білім беру ұйымдарында білім алатын студенттерге 31 422 теңге шәкіртақы беріледі.
Қаулы 2023 жылғы 1 қыркүйектен бастап қолданысқа енеді. Сонымен қатар, Мемлекет басшысының Жолдауын іске асыру аясында келесі айдан бастап мектепке дейінгі тәрбие мен оқыту педагогтерінің жалақысы 30 пайызға өседі.
Еске салайық, бұған дейін депутат ауыл шаруашылығы мамандықтарында оқып жатқан студенттердің шәкіртақысын көтеруді ұсынғаны хабарланған еді.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова