Қырғызстанға заңсыз бензин тасыған “мафия“ әшкереленді

ҚМА Қырғызстанға АИ-92 маркалы бензинін заңсыз шығарумен айналысқан қылмыстық топтың қызметін тоқтатты, - деп хабарлайды Massaget.kz тілшісі.

Мән-жай

Қылмыстық АИ-92 маркалы бензинін Қырғыз Республикасына заңсыз шығарып, сатып отырған. Тергеу барысында күдіктілер Қазақстан аумағында бензинді еріткіш және дистиллят ретінде рәсімдеп, жалған құжаттар арқылы шекарадан заңсыз өткізгені анықталды.

Жедел іздестіру іс-шаралары барысында "Түрксіб" станциясында заңсыз жолмен жөнелтілген 500 тоннаға жуық бензин тиелген 8 теміржол цистернасы ұсталды. Жүк "Қара Май Ойл" шағын мұнай өңдеу зауытынан жөнелтілген және Қырғызстанға бағытталған.

Тергеу мәліметтеріне сәйкес, 2023-2024 жылдары бұл шағын зауыттан 102 мың тоннадан аса мұнай өнімдері көрші мемлекетке экспортталған.

Күдіктілер туралы не белгілі?

Алдын ала есеп бойынша қылмыстық топтың айналымы кейінгі екі жылда 15,5 млрд теңгеден асып түскен.

"Бұл іс бойынша үш күдіктіге мемлекетаралық іздеу жарияланды:

• Попов Алексей Александрович, 27.04.1987 жылы туған, Қазақстан Республикасының азаматы, Жамбыл облысы, Тараз қаласының тумасы, бұрын сотталмаған;
• Ибраимов Рахымжан Маматұлы, 29.01.1996 жылы туған, Қазақстан Республикасының азаматы, Өзбекстан Республикасының Чартак қаласының тумасы, бұрын сотталмаған;
• Сағындықов Серік Ерланұлы, 29.07.1987 жылы туған, Қазақстан Республикасының азаматы, Жамбыл облысының тумасы, бұрын сотталмаған", - деп жазылған хабарламада.

Оларға қамауға алу түріндегі бұлтартпау шарасы таңдалды.

Қызықты жаңалықтар мен видеоларды көру үшін TikTok арнамызға жазылыңыз!