Қаржылық мониторинг агенттігі АИ-92 маркалы бензинді Қырғыз Республикасына заңсыз шығарумен айналысқан қылмыстық топқа қатысты тергеп-тексеруді аяқтады, - деп хабарлайды Massaget.kz тілшісі.
Топ құрамында 9 адам болған. Заңсыз схеманы жүзеге асыру үшін олар мұнай өнімдерін сатып алу, құжат рәсімдеу және экспорттау мақсатында 12 заңды тұлғаны тіркеген. Бензиннің шығу тегін заңдастыру және оны шетелге шығару үшін күдіктілер "Қара Май ОйЛ" ЖШС мен Petro Bazis ЖШС шағын мұнай өңдеу зауыттарын пайдаланған.
Құжат жүзінде кәсіпорындар АИ-92 бензинін жеңіл дистиллятпен немесе еріткішпен араластыру қызметін көрсеткен. Алайда шын мәнінде олардың қызметі бензинді ешқандай технологиялық өңдеусіз теміржол цистерналарына құюмен ғана шектелген. Кейін жалған құжаттар рәсімделіп, сол арқылы бензин ароматты көмірсутектер қоспасы, еріткіштер немесе жеңіл көмірсутектер қоспасы ретінде декларацияланған.
Осылайша бензин мұнай-химия өнімі ретінде көрсетіліп, Қырғыз Республикасына заңсыз шығарылған. Бұл әрекеттер елдің ішкі нарығында мұнай өнімдері тапшылығы байқалған кезеңде де жүзеге асырылған.
Заңсыз экспортталған бензин көлемі 190 мың тоннадан асып, қылмыстық топтың көлеңкелі айналымы 37,2 млрд теңгеден асқан. Жедел іздестіру іс-шаралары барысында "Түрксіб" станциясында Қырғыз Республикасына жөнелтілмек болған шамамен 500 тонна заңсыз бензин тиелген 8 цистерна анықталған. Құны 138 млн теңге болатын бензин мемлекет кірісіне өткізілді.
Қылмыстық іс сотқа жолданды.
Instagram парақшамызға жазылып, ең қызықты ақпараттарды бірінші болып оқыңыз!