"Құтырмаға шалдыққан мал етінен бәліш пісіріп, жолда сатады": желіде адамшошырлық ақпарат тарады
!["Құтырмаға шалдыққан мал етінен бәліш пісіріп, жолда сатады": желіде адамшошырлық ақпарат тарады](/userdata/news/news_110918/image_l.jpg)
Ауыл шаруашылығы министрлігі "Қырғызстаннан құтырмаға шалдыққан мал еті елге әкелінді" деген ақпаратты жоққа шығарды, - деп хабарлайды Massaget.kz тілшісі stopfake.kz-ке сілтеме жасап.
WhatsApp-та тараған аудиохабарламада Қырғызстаннан құтырмамен ауырған малдың еті Қазақстанға әкелінгені айтылады.
"Аудиода одан бәліш пісіріп, жол үстінде сататыны айтылады. Бұл - ескі фейк", - деп жазылған басылым мәліметінде.
ҚР Ауыл шаруашылығы министрлігі өкілдері де бұл ақпаратқа пікір білдірді.
"2011 жылғы 19 қазанда ауыл шаруашылығы жануарларының аусыл ауруы бойынша енгізілген қолданыстағы шектеуге байланысты Қырғыз Республикасы аумағынан ауыл шаруашылығы жануарлары, сондай-ақ, сиыр, қой және шошқа еті әкелінбейді. Егер етті контрабандалық жолмен тасымалдау әрекеті расталса, шекарада бақылауды күшейту бойынша шаралар қабылданады", - деп жазылған ведомство хабарламасында.
Дәл осындай аудиохабарлама 2021 жылы да тараған болатын.
Айта кетейік, Жамбыл облысындағы Қырғыз Республикасымен шекарада төрт ветеринариялық-бақылау бекеті жұмыс істейді: Қарасу, Қордай, Сыпатай Батыр және Айша-Бибі, онда ветеринариялық инспекторлар тауарларды әкелу, әкету және транзиттеу кезінде құжаттамалық, физикалық және зертханалық тексеріс жүргізеді.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова