Күні бойы сергек жүру үшін қанша сағат ұйықтау керек?

Ересек адам жеткілікті ұйықтау үшін күніне қанша сағат ұйықтауы керек? Ұйқы фазалары дегеніміз не және олардың маңыздылығы қандай? Ұйқының ұзақтығы адамның жасына, жынысына қарай ерекшелене ме? Massaget.kz тілшісі ғылыми зерттеулерді жинақтады. 

Ұйқы фазасы қалай жұмыс істейді?

Ұйқы шамамен 90 минутқа созылатын бірнеше қайталанатын циклдардан тұрады. Әрбір цикл төрт фазаны қамтиды: үш – баяу ұйқы (NREM - Non Rapid Eye Movement), олар көздің баяу қозғалысымен ерекшеленеді. Және бірі – жылдам ұйқы (REM - Rapid Eye Movement), жылдам көз қозғалысынан тұрады.

Қалғып кету – бұл ұйқының өтпелі кезеңі. Адам қалғып кетсе, ол жартылай ұмытшақ күйде болады. Ми белсенділікті бәсеңдетеді, дене бірте-бірте екінші фазаға – таяз ұйқыға ауысады. Бұл кезеңдерде адам басқаларға қарағанда оңай оянуы мүмкін.

Терең ұйқы – бұл дене күш алатын үшінші кезең. Дене физикалық белсенділіктен кейін қалпына келеді, иммундық жүйе белсендіріледі.

Жылдам ұйқы – ұйқының соңғы кезеңі: мидың белсенділігі артады, ол күн ішінде алынған ақпаратты өңдейді, талдайды, сұрыптайды және «сөрелерге» қояды. Бұл кезеңде адам армандайды және түс те көреді. 

Тәулігіне неше сағат ұйықтаған дұрыс?

Толық түн ұйқысын алу үшін адамға 5-6 ұйқы циклі қажет деп есептеледі. Сондықтан сомнологтар ересектерге күніне кемінде 7,5 сағат ұйықтауға кеңес береді. Ал балаларға – жасына байланысты. Бала неғұрлым жас болса, соғұрлым ұзақ ұйықтауы керек. Стрестік кезеңдер (мысалы, емтихандар) кезінде сіз балаңыздың ұйқы уақытын кем дегенде бір сағатқа көбейтуіңіз керек.

Дегенмен бұл стандарттар барлығына жарамайды: кейбіреулері көбірек уақытты қажет етеді, басқалары аз. 

Қай уақытта ұйықтаған дұрыс?

Ғалымдардың пікірінше, сағат 22:00-ден 23:00-ге дейін ұйықтап, 7:00-8:00-де оянған дұрыс деп саналады.

Бұл уақытта гипофиз, эндокриндік жүйе, бүйрек үсті бездері және басқа органдар дененің демалуына және оны жұмыс жағдайында ұстауға мүмкіндік беретін гормондар шығарады.

Қызықты жаңалықтар мен видеоларды көру үшін TikTok арнамызға жазылыңыз!