Краннан аққан су қатерлі ісік тудыратыны рас па?

Әлеуметтік желілерде тараған видеода өзін дәрігер деп атаған адам краннан аққан суда радиация мен зиян заттар барын айтқан. Ол суды фильтрден өткізбесе немесе оған Гималай тұзын қоспаса, онда қатерлі ісікке шалдығуыңыз мүмкін дейді. Бұл - жалған ақпарат, - деп хабарлайды Massaget.kz тілшісі.

Сұхбат 2014 жылғы қазанда дәрігердің YouTube-арнасында жарияланған. Бірақ ол дәрігер емес. Леонард Колдуэллдың шын есімі - Бернд Кляйн. Ол - әр видеода дүниежүзілік қастандық туралы айтатын талантты оратор. Оның айтуынша, бәрі өтірік айтады - дәрігерлер, өнеркәсіпшілер, қаржыгерлер, саясаткерлер. Көбіне Колдуэллдің өзі өтірік айтады. Журналистер оның ғылыми дәрежелерін АҚШ-та ақшаға сатып алғанын анықтады.

Колдуэллдың айтуынша, ол қатерлі ісіктен 30 мыңнан аса науқасты емдеген. Ал бұған құжаттай дәлел келтіруді сұрағанда, ол сауығып кеткен адамдарға үндемегені үшін пара беретін жауларын желеу етеді. Ол ажалдан аман қалғанын айтады, өйткені фармацевтика индустриясы оның аузын жабу үшін бірнеше рет кісі жалдап, өлтірмек болған. 90-жылдардың соңында ZDF неміс мемлекеттік арнасының эфирінде Колдуэллді жалған атақты деп атайды. Ол кезде жалған дәрігер Telekom және Lufthansa компанияларында жұмыс істегені туралы өтірік айтқан, ал ондағылар ол туралы естімеген екен.

Фейктерге қарсы ұйымдар Колдуэллды бірнеше рет әшкерелемек болған. 2020 жылы жалған дәрігер COVID-19 адамдарды чиптеу үшін әдейі жасалған деп мәлімдеді.

Ал бұл видеода псевдодоктор судағы фтор мен хлордың әсерінен қатерлі ісік ауруы пайда болуы мүмкін дейді. Америкалық онкологиялық қоғам суға фтор қосудың адам денсаулығына әсері туралы ғылыми шолуларды іріктеп, талдап шықты. Осы зерттеулердің кейбіріне тоқталайық. 2010 жылы Денсаулық пен қоршаған ортаға төнген қауіп-қатер жөніндегі Еуропалық ғылыми комитет (SCHER) судағы фторидті остеосаркомамен байланыстыруға негіз жоқ деген қорытындыға келді. Бір жылдан кейін Калифорния канцерогенді анықтау комитеті (CIC) қатерлі ісіктің фторид пен оның тұздарынан болатынына дәлелдер жоқ деп мәлімдеді. Ғалымдар мынадай ортақ пікірге келді: суға фтор қосу мен адамдарда онкологиялық аурулардың болуы қаупінің арасында нақты байланыс жоқ.

Джонс Хопкинс университетінің Қоршаған ортаны қорғау және инженерия кафедрасының доценті Карстен Прассе суға хлор қосу адам ағзасына зиян тигізбейтінін айтады. Ауруларды бақылау және алдын алу орталықтарының (CDC) мәліметтері бойынша, ауызсуға хлор қосқанда микробтар мен бактериялар өледі. Сонымен қатар, су арқылы берілетін ауруды, мысалы, тырысқақ немесе іш сүзегін жұқтыру қаупі азаяды.

Бірақ хлордың суда болатын фенолдармен қосындысы жанама өнімдер қалыптастырады.  Ғалымдардың айтуынша, олар ұзақ мерзімді перспективада адамға зиян тигізуі ықтимал. Бірақ қандай және қашан, ешкім нақты айта алмайды, әлі зерттеулер жоқ.

Қоршаған ортаны қорғау агенттігі (EPA), Халықаралық қатерлі ісіктерді зерттеу агенттігі (IARC) және Денсаулық сақтау және халыққа қызмет көрсету министрлігі (DHHS) хлорды адам канцерогені ретінде жіктемейді. 

Колдуэлл пластик бөтелкедегі су денсаулыққа қауіпті деп мәлімдейді. Әйелдерде сүт безі қатерлі ісігі дамиды, ал ерлердің ағзасына әйел гормондары енеді екен. Австралиялық қатерлі ісікке қарсы кеңес мұны жалған ақпарат деп атады. Бір кездері адамдар көп жыл бойы бір-біріне Уолтер Рид әскери медициналық орталығы мен Джонс Хопкинс университетінің атынан электрон хаттар жіберіп келді. Оларда бұл құрметті ұйымдар пластик бөтелкеден су ішуге болмайды деп мәлімдеді деп жазылған. Бұл онкологиялық аурулардың пайда болу қауіпін тудырады. Кейіннен мұның жалған екені және екі мекеме де бұл хаттар туралы ештеңе білмегені анықталды. Ғалымдардың пайымдауынша, пластик бөтелкелерден су ішу қауіпсіз, тіпті ол қатып қалса немесе оны ыстық күннің астында машинада ұмытып кетсеңіз де. Бөтелкені қайта пайдалануға да болады. Қандай да бір зиянды заттардың бөлінетініне дәлелдер табылмаған.

Колдуэлл айтқан бесфинол А (BPA) пластик бөтелкелерде жоқ. Суға арналған бөтелкелер шығару үшін ПЭТ деп аталатын полиэтилентерефталат қолданылады. Бірақ ВРА бөтелкеде болса да, ол тамақпен, сусындармен байланыста қауіпсіз болады.

Сондай-ақ, Колдуэлл суда да радиация бар дейді. 2019 жылы ауыз судың құрамында тритий бар деген жалған ақпарат Францияда аптап ыстық болғанда таралды. Шенеуніктер жалған ақпарат таратуды тоқтату үшін барлық медициналық ұйым мен бұқаралық ақпарат құралын тартуға мәжбүр болды. Денсаулық сақтау ұйымдары суды радиациялық бақылауды тұрақты негізде жүргізеді. 

Колдуэлл суға қосуды ұсынған гималай тұзының кәдімгі ас тұзынан артықшылығы жоқ. Оның үстіне, құрамында микроэлементтер мен минералдар, оның ішінде натрий бар. Оны жиі қолдану қан қысымының жоғарылауына және жүрек-қан тамырлары ауруларының болу қаупіне әкеледі, бұл остеопорозды асқындырып, бүйрек проблемаларын тудыруы ықтимал.

Демек, Леонард Колдуэллдің видеодағы мәлімдемелері дәлелденбеген және ғылымға қарсы.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!