"Көзімнен сорам сорғалап жаздым". Серікзат Дүйсенғазы марқұм ұлының үлгермей кеткен ісін қолға алды

Ақын, Лев Гумилев атындағы Еуразия ұлттық университетінің "Телерадио және қоғаммен байланыс" кафедрасының меңгерушісі Серікзат Дүйсенғазы марқұм ұлының жете алмай кеткен арманын жүзеге асырмақшы. Ол дарынды балаларды қолдау қорын мемлекеттік тіркеуден өткізген, - деп хабарлайды Massaget.kz тілшісі.

Ақын бұл туралы Instagram-дағы парақшасында жазды. 

"Қайтыс болған баласының арманы үшін арпалысқан әкені кім көрді екен? Ешкім көрген жоқ шығар, сірә! Лайым көрмей-ақ қойсын! Ондай әке бізге дейін болған дейді. Бірақ Америкада. Нәтижесі атақты Стэнфорд университеті. Біз де марқұм баламыздың жете алмай кеткен арманын жүзеге асырсақ деп жанұшырып жүгіріп жүрген жайымыз бар. Бүгін соның алғашқы асуын алдық. Ауыр қайғының да бір қуанышы болады екен-ау. Төбем көкке жеткендей қуанып отырмын қазір. Естеріңізге болса, Әлихан балам қайтыс болғаннан кейін жазған алғашқы постымда қазағымның келешегі үшін қызмет етемін деп уәде беріп едім. Бірнеше ай қалың қағазбен алысып жүріп "Әлихан Мақсұт атындағы дарынды балаларды қолдау қорын" мемлекеттік тіркеуден өткіздім. Оның Уставының әр парақшасында менің әкелік көз жасым бар. Көзімнен сорам сорғалап отырып әр жолын өз қолыммен жазып шықтым. Өте қиын болды, ағайын! Мұндайды ешкімнің басына бермесін!", - деп жазды ол.

Серікзат Дүйсенғазының айтуынша, қоғамдық қор өз жұмысын бастаған. Алғашқы шарасы 13 мамырда Лев Гумилев атындағы Еуразия ұлттық университетінің бас ғимаратында өтеді.

"Алғашқы шарамызды тәжірибе жинақтау үшін қалалақ деңгейде өткізгенімізбен, келесі жылдан бастап Германия, Испания, Швеция, Жапония, Түркия, т.б. сияқты технологиясы дамыған елдердің командаларын шақырып, халықаралық деңгейде өткізуді жоспарға енгіздік, - деп жазды ақын.

Посмотреть эту публикацию в Instagram

Публикация от Серікзат Дүйсенғазы (@serikzat_duisengazy)

Еске салайық, жылдың басында Серікзат Дүйсенғазының ұлы Көкшетаудағы демалыс орнында қайтыс болды. Айтыскер ақын марқұм ұлы туралы жантебірентерлік жазба жариялады. 

Сондай-ақ кейінірек Серікзат Дүйсенғазының ұлы мерт болған курортта тағы екі қыз жарақат алғаны белгілі болды.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!