Қостанайдағы екі 6 жасар баланың жұмбақ өлімі: қылмыстық іс қозғалды

Қостанай облысында жұмбақ жағдайда қайтыс болған екі 6 жасар баланың өліміне қатысты екі қылмыстық іс қозғалды, - деп хабарлайды "Алау" басылымы.

Қостанайлық Полиция департаменті өкілдерінің мәліметінше, Рудныйдағы екі баланың өліміне қатысты тергеу басталған. Іс екі бап бойынша қозғалды: "Қауiпсiздiк талаптарына сай келмейтін тауарларды шығару немесе сату, жұмыстарды орындау не қызметтер көрсету" және "Медициналық немесе фармацевтикалық қызметкердің кәсіби міндеттерін тиісінше орындамау". 

Еске салайық, 14 қазанда Қостанай облысында екі 6 жасар бала жұмбақ жағдайда қайтыс болғаны хабарланған еді. Полиция осы іс бойынша соталды тергеуді бастады. "Наша Газета" мәліметінше, мессенджерлерде әйел адам екі баланың өліміне есірткі себеп болуы мүмкін екенін айтып жатқан аудио тараған. 

"Үш күн бұрын әйел екі баласымен дүкенге барған, балалар сыртта қалған. Үйге келген кезде балалардың қолында белгісіз ер адам берген кәмпит болған. Кешке ұйықтар кезде ұлдары айғайлап, күле бастаған. Әйел балаларын көтерсе, олар өздігінен тұра алмаған. Осылайша, балаларды жедел жәрдем алып кеткен, бірақ келесі күні олар үйіне жіберілген. Сол күні екі бала жұмбақ жағдайда қайтыс болған", - деп жазады басылым. 

Ал "Алау" басылымының мәліметінше, дәрігерлер балалар уланып қалған болуы мүмкін екенін айтады. Қостанай облысы денсаулық сақтау басқармасының баспасөз хатшысы Ксения Жылқыбаеваның сөзінше, балалардың өлім себебін сарапшылар анықтайды. 

"Оның ішінде, улануға қатысты сараптама да тағайындалды. Уланып қалуы да мүмкін. Қазірдің өзінде қажет материал алынды. Токсикологиялық сараптаманың нәтижесі 12-14 күннен кейін белгілі болады", - дейді Ксения Жылқыбаева.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!