Қостанайда көпқабатты үйде өрт шықты: 25 адам эвакуацияланды

Қостанайлық құтқарушылар өрт кезінде 25 адамды эвакуациялады, – деп хабарлайды Massaget.kz тілшісі.

Қостанай қаласы Юбилейный шағынауданында көпқабатты тұрғын үйдің төртінші қабатындағы пәтерлердің бірінде жиһаз өртенді.

"Өрт сөндірушілердің үйлесімді әрекеттерінің арқасында өрттің басқа пәтерлерге таралуына жол берілмеді. ТЖМ құтқарушыларының күшімен баспалдақ маршы арқылы 25 адам, оның ішінде 4 бала эвакуацияланды", – делінген хабарламада.

Өрт толығымен сөндірілді, жалын 15 шаршы метр аумақты шарпыды. Зардап шеккендер жоқ, өрттің шығу себебі анықталып жатыр.

ТЖМ азаматтарға өрт қауіпсіздігі ережелерін сақтауды және балаларды ересектердің қарауынсыз қалдырмауды ескертті.

Өзекті жаңалықтарды өз уақытында оқу үшін Facebook парақшамызға жазылыңыз!