Жуырда Павлодар облысында босанған 12 жастағы қыз жұртты шулатты. Massaget.kz тілшісі былтыр және биыл кәмелетке толмаған қанша қыз ана атанғанын анықтады.
Денсаулық сақтау министрлігінің ресми жауабына сүйенсек, былтыр 14 жасқа дейінгі 11 қыз босанған, биыл 6 айдағы көрсеткіш бойынша 14 жасқа дейінгі 12 қыз ана атанған.
Былтыр 15-17 жас аралығындағы 747 қыз, биыл 714 қыз босанған.
Министрлік 14 жасқа дейін ана атанған қыздар қай өңірлерде тіркелгені туралы мәлімет ұсынды:
Ресми мәліметке сүйенсек, мұндай жағдай Түркістан облысында көп тіркелген.
Ведомство мәліметінше, 15-17 жастағылар арасындағы жүктілік көрсеткішіне тек оқушы қыздар емес, коледждердегі студенттер және мектептен тыс оқитын жасөспірім қыздар кіреді.
Министрлік мәліметіне сүйенсек, медицина қызметкерлері ерте жыныстық қатынастың, аборттың профилактикасы, жеке гигиена мәселелері, жыныстық жолмен берілетін инфекцияның алдын алу, репродуктивті денсаулықты сақтау және нығайту, емшек сүтімен қоректендіру, отбасын жоспарлау бойынша ақпараттық түсіндіру жұмыстарын тұрақты негізде жүргізеді.
Ведомство тарапынан Жастар денсаулық орталығы құрылған. Орталық 10 жастан 18 жасқа дейінгі кәмелетке толмағандар мен жастар, ата-аналар мен педагогтер арасында ерте жыныстық өмірдің алдын алу, отбасын жоспарлау, контрацептивтерді пайдалану, қалаусыз жүктіліктің алдын алу мәселелері бойынша ақпараттық түсіндіру жұмыстарын жүргізеді.
Еске салайық, бұған дейін Павлодар облысында босанған 12 жастағы оқушыға қатысты жаңа деректер шыққаны хабарланды. Бұл туралы Павлодар облысындағы Бала құқықтары жөніндегі уәкіл Сәуле Шәкенова мәлімдеді. Оның сөзінше, Бала құқықтары жөніндегі уәкіл Динара Зәкиеваның тапсырмасымен жуырда босанған оқушының отбасы тұрып жатқан Галкино селосына барған.
Кейінірек дәрігерлер дүниеге сәби әкелген 12 жастағы қыздың жағдайын айтты.
Instagram парақшамызға жазылып, ең қызықты ақпараттарды бірінші болып оқыңыз!