Қорқынышты кадр: Қызылордада үйлердің біріндегі жарылыс видеоға түсіп қалған

Қызылордада үйлердің біріндегі жарылыс видеоға түсіп қалған, - деп хабарлайды Massaget.kz тілшісі.

Қызылордада газ ауа қоспасы жарылысынан, одан кейін шыққан өрт салдарынан 41 жастағы ер адам зардап шекті. Ол күйік алып, ауруханаға жатқызылды. Жарылыс жеке үйде болған. Ал бұл сәт бейнебақылау камерасына түсіп қалған.

"Қызылордада Яншина көшесіндегі жеке тұрғын үйде газ-ауа қоспасы жарылысы болды, салдарынан 182 шаршы метр аумақ жанып, опырылды. Әрі қарай өрт осы үй аумағында орналасқан 60 шаршы метрлік уақытша құрылыс нысанына тараған. Құтқарушылар келгенге дейін аяқ-қолы күйіп қалған Өзбекстан Республикасының 1984 жылы туған азаматы қалалық ауруханаға жеткізілді", - делінген ведомство хабарламасында.

Сурет: Қызылорда облысы ТЖД

Оқиға орнында штаб құрылып, өрт сөндірілген.

"Өрт сағат 12.09-да ауыздықталды. Оқиғаның себебі анықталып жатыр", - деп толықтырды ТЖ департаменті өкілі.

Оқиға орнына Қызылорда облысы ТЖД-ның 25 қызметкері және 5 техникасы, медицина орталығының 4 қызметкері және 1 техникасы, "ҚазТрансГазАймақ" АҚ-ның 3 қызметкері және 1 техникасы, "КРЭК" АҚ, сондай-ақ жергілікті полиция қызметі басқармасының қызметкерлері жұмылдырылған.

Айта кетейік, 17 сәуірде таңғы сағат 5 шамасында (Астана уақытымен) Жаңаөзен қаласындағы 2-шағынауданда екі кіреберістен тұратын 12 пәтерлі екі қабатты тұрғын үйде жарылыс болған еді. Алдын ала болжам бойынша газ жарылғаны хабарланды. Ал салдарынан 150 шаршы метр кіреберіс қираған.

Еске салайық, бұған дейін Жаңаөзен қаласындағы тұрғын үйлердің бірінде газ жарылып, салдарынан 11 адам зардап шеккені хабарланған болатын. Сондай-ақ, құтқарылғандарды және медициналық көмекке жүгінгендерді қосқанда барлығы 8 адам ауруханаға жатқызылған еді. Ал кейін Жаңаөзендегі жарылыс кезінде зардап шеккендердің бірі жүкті әйел екені айтылды. Кейін Президент Қасым-Жомарт Тоқаев Жаңаөзендегі жағдайға қатысты пікір білдірді. 

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!