Президенттің тапсырмасымен құрылған комиссия Қазақстан Қорғаныс министрлігіндегі кешенді тексерістің аралық қорытындысын ұсынды. Тексеру ведомствоның 104-тен астам нысанын қамтыды, ал анықталған жекелеген заңбұзушылықтар бойынша сотқа дейінгі тергеу амалдары басталды, деп хабарлайды Massaget.kz Ақордаға сілтеме жасап.
Комиссия жұмысы аясында қауіпсіздікті қамтамасыз етуге, әскери қызмет өткеруге тиісті жағдай жасауға, азық-түлікпен және киім-кешекпен жабдықтаудың, медициналық көмек көрсетудің сапасына, сондай-ақ мемлекеттік мүліктің сақталуына баса назар аударылып отыр.
Сонымен қатар бюджет қаражатының пайдаланылу тиімділігіне аудит жүргізіліп жатыр.
"Қазіргі уақытта қылмыстық қудалау органдарының қарауында 37 іс бар. Тергеу мүддесіне байланысты бұл істер жөніндегі мәліметтер әзірге жария етілмейді", - делінген хабарламада.
Тексеру "Заң және тәртіп" қағидаты негізінде жүргізіліп жатыр. Оның мақсаты – Қарулы Күштердің жауынгерлік әзірлігін қамтамасыз ету және әскери тәртіпті нығайту үшін жүйелі шаралар әзірлеу.
Комиссияның ұсынымдары Әскери реформа жоспарын іске асыру барысында да пайдаланылып отыр. Комиссия жұмысы биыл қарашада аяқталады.
Қорғаныс министрлігіндегі істердің жай-күйін кешенді тексеру жөніндегі комиссия қыркүйек соңында Президент Қасым-Жомарт Тоқаевтың тапсырмасымен құрылды. Бұл Каспийдегі оқу-жаттығу кезінде 14 әскери қызметші қаза тапқаннан кейін болды.
21 қазанда Тоқаевтың төрағалығымен өткен Қауіпсіздік Кеңесінің отырысында Әскери реформа жоспары мақұлданды. 24 қазанда Қорғаныс министрлігі оны іске асыру басталғанын хабарлады.