Қорғаныс министрі Руслан Жақсылықов баласын әскерге жіберуге уәде берді
![Қорғаныс министрі Руслан Жақсылықов баласын әскерге жіберуге уәде берді](/userdata/news/news_94667/image_l.jpg)
Қорғаныс министрі Руслан Жақсылықов баласын әскерге жіберуге уәде берді, - деп хабарлайды Massaget.kz тілшісі.
"Қазір ұлымның жасы жиырмада, ол – студент. Оқуын тәмамдаған соң өзі таңдаған бағыт бойынша әскерге өзім жетектеп апарамын. Алайда арнайы құрылымдарға барғаны абзал", - деді Руслан Жақсылықов Мәжілістің жалпы отырысының соң.
Еске салайық, бұған дейін депутат Ринат Зайытов қорғаныс министрі Руслан Жақсылықовтан шенеуніктердің баласының әскерге баруы туралы сұраған болатын.
"Мен осы уақытқа дейін министрдің, әкімнің баласы әскерде жүр дегенді естімеймін. Осының аясында жоғарғы лауазымды тұлғалардың не өздерін, не балаларын екі айлық әскери дайындыққа міндеттейтін норма қарастыруға бола ма?", - деп сұрады депутат.
Руслан Жақсылықов ұлын әскерге жібергендер ол туралы әдетте айтпайтынын жеткізді.
"Жүрекпен патриот болу керек. Көзбояушылық жасамау керек. Мысал келтіре кетейін. Бұрынғы ішкі істер министрі, генерал-полковник Қалмұхамет Қасымов екі інісін маған әкеліп, сарбаз болуға жіберді. Сенатор Құл-Мұхаммед мырзаның ұлы беделді мектепті бітіріп, мерзімді қызметтегі сарбаз ретінде қызмет етті, қазір ол АҚШ-тағы әскери училищенің курсанты. Бұл үлгі бола алмай ма?", - дейді министр.
Аяз Есен
Instagram парақшамызға жазылып, ең қызықты ақпараттарды бірінші болып оқыңыз!
Massaget.kz