Қонаевта мысықты өлтірген ер адам алты айға сотталды
![Қонаевта мысықты өлтірген ер адам алты айға сотталды](/userdata/news/news_75668/image_l.jpg)
Қонаев қаласының соты баланың көзінше мысықты өлтірген қала тұрғынына үкім шығарды, - деп хабарлайды Massaget.kz тілшісі.
Прокуратура қылмыс болған дүкенге кіреберістегі бақылау камерасынан бейнежазбаны алдыртқан.
Онда мас ер адам мысықпен ойнап тұрған балаға жақындап, кейін жануарды тепкілегені көрінеді. Мысық қабырғаға соғылып барып өледі. Ал ер адам кетіп қалған.
Алматы облысының прокуратурасы Қазақстанда жануарларға қатыгездік көрсеткендерге жаза күшейгенін айтты. Қылмыстық кодекстің 316-бабының 3-бөлігі бойынша көпшілік орында және балалардың көзінше жасалған мұндай әрекеттер үшін бір жылға дейін бас бостандығынан айыру көзделген.
Кінәлі анықталды. Ол қаладағы кәсіпорындарының бірінде жұмыс істейтін және балалары бар Қонаев қаласының 38 жастағы тұрғыны болып шықты.
"Ол мас күйінде үй жануарын себепсіз ұрып-соғып, кейін қатты өкінген. Қонаев прокуроры Айдос Шорманов азамат Қ. (1984 жылы туған) кінәсін мойындап, мұнысына өкініп отырғанын ескеріп, сотталушыға бас бостандығын алты ай мерзімге шектеу түрінде жаза беруді сұрады", - дейді Алматы облысы прокуратурасының баспасөз қызметі.
Сот прокурордың ұсынысын қолдап, кінәліге осы жазаны кесті.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Г. Досымшалова