"Көмек сұраған дауысы естілді". Қостанай облысында 84 жастағы зейнеткер қайтыс болды
!["Көмек сұраған дауысы естілді". Қостанай облысында 84 жастағы зейнеткер қайтыс болды](/userdata/news/news_94931/image_l.jpg)
Қостанай облысында учаскелік полиция 84 жастағы зейнеткерді көлден алып шықты. Алайда ол кейін қайтыс болды, - деп хабарлайды Massaget.kz тілшісі ІІМ баспасөз қызметіне сілтеме жасап.
Оқиға бүгін, 18 қарашада Әулиекөл ауданында болған. Таңертең 102 телефонына Аманқарағай кентінің тұрғынынан су айдыны жақтан көмек сұрап тұрған қатты дауыс естілгені туралы қоңырау түсті.
Бұл хабарламаны естіп, учаскелік полиция инспекторы Ғабит Байжанов дереу көлге келген. Желден ол көмекке шақырған дауысты қатты естімеген. Жағадан өтіп бара жатқан полиция қызметкері дауыс көлдің ортасынан шығып жатқанын түсініп, бірден киімімен суға секіріпті.
"Ғабит Байжанов зейнеткерді жағаға сүйреп апарды, оған жақын тұрған ауылдастары көмектесті. Олар бірге кейуананы үйге жеткізіп, жедел жәрдем шақырды. Дәрігерлер оны ауруханаға жеткізді", - делінген хабарламада.
Қарт кісі көлдің ортасына қалай жеткені анықталып жатыр. Кейінірек дәрігерлер оның ауруханада қайтыс болғанын хабарлады. Оны судан шығарған полиция қызметкері мен ауылдастары соңына дейін бәрі жақсы аяқталады деп үміттенген.
Өзекті жаңалықтарды өз уақытында оқу үшін Facebook парақшамызға жазылыңыз!
Ж. Қадыржанова