"Коктейль ұсынды". Алматыда 22 жастағы қызға танысы зорлық көрсеткен
!["Коктейль ұсынды". Алматыда 22 жастағы қызға танысы зорлық көрсеткен](/userdata/news/news_98896/image_l.jpg)
Алматыда 22 жастағы аруды танысы белгісіз сусын ішкізіп, алдап, зорлық көрсеткен. Жәбір көрген бойжеткен бірнеше ай бойы әділдік іздеп жүр. Құзырлыларға жүгінген. Алайда, оның айтуынша, іс орнынан жылжымай тұр, - деп хабарлайды Massaget.kz тілшісі astana.tv арнасына сілтеме жасап.
Элина есімді бойжеткен құрбыларымен бірге демалыс орнында кеш өткізген. Біраз уақыттан соң бұрыңғы танысы келіп, қызды сөзге тартып, коктейль ұсыныпты. Кейін ол өзін нашар сезініп, құрбысымен көлік шақыртады. Алайда күдікті бірге баруға ұсыныс тастап, қыздарды шығарып салғысы келеді.
"Өзі такси шақырды, құрбым түсіп қалған соң, мені өз үйіне алып барды. Есімді жия алмай, есеңгіреп тұрдым. Күшімді жинап, қарсылық көрсетуге тырыстым. Ештеңе шықпады, таңертең ғана есімді жиып, жақындарымды шақырып, мені алып кетулерін өтіндім. Ең сорақысы, екі сот-медициналық сараптамада зорлықтың анық белгілері, зақымдар белгілі болды", - деді жәбірленуші.
Зорлықтың құрбаны болған бойжеткен құқық қорғау органдарына арыз жазып, қылмыстық іс қозғалды. Бірнеше ай бойы Элина психологиялық қиындықтардан жұмысына да шыға алмай қалды. 288 күндік тергеуден кейін полиция істі прокуратураға жөнелтеді. Алайда прокурор сол күні істі қосымша тергеуге жіберуді ұйғарды. Араша сұрап бойжеткен қоғамдық қордың көмегіне жүгінеді.
"Біздің 6 жылдық тәжірбиемізде бұл ең ұзақ әрі қиын істердің бірі. Себебі де түсініксіз, өйткені дәлелдің бәрі бар, куәгерлер бар. Нақты күдікті де белгілі. Осының бәріне қарамастан, жәбірленуші осынша уақыт психологиялық қысымда өмір сүріп келді, ісі сотқа әлі жетпеді", - деді "Svet" қоғамдық қорының директоры Кирилл Вшивков.
Алматы қаласының прокуратурасы бұл іске қатысты ешқандай мәлімдеме жасамай, журналистердің хатына әлі жауап қайтармады. Алматы қалалық полиция департаменті сотқа дейінгі тергеу жүргізіп жатқанын хабарлады.
"Өндіріс аясында қажетті сараптамалар жүргізілді. Қазіргі уақытта қылмыстық іс бойынша істің объективті мән-жайларын анықтауға бағытталған тергеу шаралары жүргізілуде", - деді Алматы қалалық полиция департаментінің ресми өкілі Салтанат Әзірбек.
22 жастағы Элина жантүршігерлік оқиғадан кейін күдікті жазасынан құтылып кете ме деп алаңдауда. Қазіргі уақытта ол бостандықта жүр
Өзекті жаңалықтарды өз уақытында оқу үшін Facebook парақшамызға жазылыңыз!
А. Жайыққызы