Көкшетауда су тасқынына байланысты төтенше жағдай жарияланды
![Көкшетауда су тасқынына байланысты төтенше жағдай жарияланды](/userdata/news/news_104163/image_l.jpg)
Көкшетауда су тасқынына байланысты жергілікті масштабта төтенше жағдай жарияланды, - деп хабарлайды Massaget.kz тілшісі.
Бұл туралы Көкшетау қаласының әкімі Бауыржан Ғайса мәлімдеді. Мұндай шешім қаланы қақ ортасынан кесіп өтетін Қылшақты өзенінің арнасынан асып кетіп, маңындағы үйлер мен көшелерді тұтастай су басқанына байланысты қабылданған.
"Жағдайды тұрақтандыру үшін Көкшетауда төтенше жағдай режимін жариялау туралы шешім қабылданды, оның шеңберінде барлық залал бағаланып, оларды өтеу жөніндегі мәселелер комиссиялық түрде шешілетін болады. 29 наурыздағы жағдай бойынша жүзге жуық адам дайындалған орындарға орналастырылды. Зардап шеккендерге қажет көмек көрсетіледі. Зардап шеккендер мына нөмір арқылы өтініш бере алады 8 775 666 99 08", - деді Көкшетау қаласының әкімі.
Абзал Алпысбайұлы
Жергілікті атқарушы орган мен төтенше жағдай қызметінің ресми мәліметінше, қазір үйлерін су басқан қала тұрғындары қауіпсіз жерге эвакуацияланып жатыр.
"Барлығы 113 адам эвакуацияланды, оның ішінде 30-ы - бала. Көкшетау қаласының "Жұмыспен қамту және әлеуметтік бағдарламалар бөлімі" ММ бейімдеу орталығына 50-ден аса адам орналастырылды. Бүгін Қылшақты өзені көтерілуіне байланысты 16 жеке үй, 29 аула және 12 көпқабатты тұрғын үй ауласы, сондай-ақ, "Ертөстік" балабақшасының 1 қабаты су астында қалды", - деді өңірдің ТЖД өкілдері.
Қазір еріген суды сору жұмыстары жалғасып жатыр.
Еске салайық, бұған дейін Абай облысындағы екі ауданда төтенше жағдай енгізілгені хабарланды.
Абзал Алпысбайұлы
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Massaget.kz