Келесі Ұлттық құрылтай Қызылордада өтеді

Қасым-Жомарт Тоқаев келесі Ұлттық құрылтай қайда өтетінін айтты, - деп хабарлайды Massaget.kz тілшісі.

"Соңғы жылдары біз ұлттық бірегейлігіміздің маңызды факторы тарих ғылымының дамуына ерекше көңіл бөліп жатырмыз. Бүгінгі Құрылтай тағы бір тарихи белеске тұспа-тұс келді. Биыл ел астанасын Қызылордаға көшіру туралы тарихи шешім қабылданғанына жүз жыл толып отыр. Осы ретте Құрылтайдың келесі отырысын Сыр бойында, кезінде Қазақ елінің астанасы болған Қызылорда қаласында өткізуді ұсынамын", - деді Президент.

Айта кетейік, Ұлттық құрылтайдың IV отырысы биыл Бурабайда өтті. Жиында Мемлекет басшысы сөз сөйлеп, Ұлттық құрылтай мүшелері қоғамдағы өзекті мәселелерге қатысты ұсыныстарын ортаға салды.

Қазақстан Республикасы Президентінің жанындағы Ұлттық құрылтай - Қазақстан Республикасының Президенті жанындағы консультативтік-кеңесші орган.

Бұған дейін Ұлттық құрылтайдың үш отырысы өтті:

• І Ұлттық құрылтай 2022 жылы Ұлытау облысында өтті.
• ІІ Ұлттық құрылтай 2023 жылы Түркістан қаласында өтті.
• ІІІ Ұлттық құрылтай 2024 жылы Атырауда өтті.

Instagram парақшамызға жазылып, ең қызықты ақпараттарды бірінші болып оқыңыз!